سجل حضورك ببيت شعر على ذوقك

[نبض ظامي]

‏أحيان ودك تلتهي .. مثل الأطفال
‏تضحك بدون أسباب وتنام فجأه

[عذب]

خيال مطير والنجلاء صحت ابدانكم وماعليكم زود وتسلمون على الإعجاب والإشادة وللجميع شكرا على التواجد والمتابعة لكم ارق تحية

وتغري قلبي الدنيا وزينتها عن الطاعه
يزينها لي الشيطان لعل امشي على امره
وطبع الناس لمراد الهوى والنفس تباعه
والابن آدم معه طول الأمل يغريه ويغره
وانامع لذة الدنيا وخوف الله والساعة
غديت الي بهالدنيا مسك في قبضته جمره

عذب

[الشامخه]

صح لسانك عذب ابدعت:).
‏تروح السنه في مغريات الحياة ذنوب
‏عسى سجدة الصايم تكفّر عن ذنوبه
‏.
‏يمر العمر والعبد مايعرف المكتوب
‏ومن لا تغااانم : راح عمره بلا توبه...

[محمد العواد]

انت اعز انسان ماتجهل غلاك

لاتظن الشوق ياتي من عدمْ

[الشامخه]

‏صمتك عن الزلات طيب وشجاعه
‏تكبر بعين الي على الطيب رباك
‏.
‏خلك سوات الضلع عزم و مناعه
‏لايزعلك هرج الردي لو تقفاك

[محمد العواد]

يالعبد لاتبدي على الناس سدّك
للسرّ برمج كلـمـة السـرّ برمـوز

الحـاجـه الـلـي للمهـونه تحـدّك
تنعاف لـو بيّن على حالك العوز

والحظ لوهو دايم الدوم ضدّك
هزيمتـك حـاول تصدّاه بالفوز

محمد العواد

[الشامخه]

اُمك ما غير اُمك وطن يابنت الاجواد
فرصة حياتك ( بــرها ) واُغـتنمها

في حضنها رحمه و قصه و ميلاد
و يكفيك بالجنه مـواطي قدمها

[محمد العواد]

الحبيب اللي يداري خاطري

مايجدّد جرح قلبي من جديد


محمد

[الشامخه]

‏ثنتين لازادتك ماهي بناقصتك
‏النيه الطيبه ... والكلمه الجزله
‏
‏الاوله ترفعك ماهي بمرخصتك
‏والثانيه تحشم إلسانك عن الهزله

[محمد العواد]

الحذر فيما عطاك الله تزيد

عن جميع انسان بانت حاجته


محمد

[الشامخه]

‏'
‏'
‏'
‏الجرح لا من جاك ،،، حاول تخفيه
‏لحدن يشوف الجرح ويجرح خوافيك

[محمد العواد]

وين المشاعر يالغلا وين الاحساس

ماتدري اني اعشقك واتمناك ؟

[الشامخه]

فيگ الجمال الطاغي المتباهي..
ي لذة السكر بكوب الشاهي..
ملامحگ فتنه وزينك راهي..
وأوصافك الفخمة من يجاريها.

[الشامخه]

‏⁦‪
‏
‏أمارته من على جده...ماهي جديده على جدي
‏يقابل ملووك من قده...ويقول كل العرب بعدي
‏
‏صح لسان شاعرها ويستاهلها نظر عيني.

[عذب]

يانايمة قلبي من الشوق مانام
ماغمضت عيني من اسباب شوقي
وانت الذي غرقان في بحر الأحلام
نايم ولا همك متاعب خفوقي

عذب

[محمد العواد]

هلا هلا بعلاج قلبي وطبّه

هلا هلا حياك يا راس مالي


بيني وبينك ياحبيبي محبّه

كلن على الثاني عزيزٍ وغالي


محمد

[الشامخه]

‏يارب والمختفي أعظم من البيّن ،
‏أنت أعلم بكل ما اعلنته ومااخفيته !
‏
‏اجعل عظيم الأمور المشكلة هيّن ،
‏واغفر لي أكبر وأصغر ذنب سوّيته !

[عذب]

طربان طير الصبح غنى بصدري
على غصون القلب رفرف جناحه
نغمات صوته تحمل الشوق بدري
استوطنت بالروح اكبر مساحه
كنه عن اشواق المحبين يدري
يحمل مراسيل الغلا في صباحه

نبضي

[الشامخه]

‏ماقلت لك بكرة نفارق وننسى
‏وتقول فال الله ولا فال فرقاك
‏.
‏ششفنا مع الأيام نكبر ونقسى
‏لين افترقنا مابقى غير ذكراك

[محمد العواد]

تعال ياللي بين نفسي وبيني

اخفي هواك وبالخفا هايمٍ فيك


تعال قرّب حط عينك بعيني

وناظر غلاك بنظرة عيون..مغليك


تعال يا بلسم مآسي سنيني

ابيك انا واغليك واشريك وارجيك

محمد

[عذب]

لاتخدعك لمعة سراب المظامي
يستدرج العطشان لمعة سرابه
كم واحد اغراه والجو حامي
خلاه ياكل في يدينه ترابه

بوحي

[محمد العواد]

لاتخدعك لمعة سراب المظامي


يستدرج العطشان لمعة سرابه

كم واحد اغراه والجو حامي

خلاه ياكل في يدينه ترابه


بوحي





صح بوحك
ياسلام عليك يالعذب
شدّتني ابياتك وانت شاعر عذب
وأتمنّى ان تتقبّـل هذه المداعبه الأخويّه
بقصد المداعبه فقط :


فاهم كلامك لكـــن افهم كلامي

انصحْك في صادق حروف الكتابه



لاتصير في كل القضايا محامي

الّا لمــن بــينــك و بـيـنه قـرابه


محمد



امزح معك لاتصدّق هههههه

تحيّاتي لك يامبدع

[ريوف]

لاتخدعك لمعة سراب المظامي
يستدرج العطشان لمعة سرابه
كم واحد اغراه والجو حامي
خلاه ياكل في يدينه ترابه

بوحي




الله الله عليك ياعذب
صح لسانك ملاايين...
ابيات في منتهى الروعه
تهيض الواحد يرد عليها ... لانها جت في الصميم..
؛


ياعذب مقصودك من النصح سامي
لابــد لـلـمكنون يـكـشف .. حـجـابه
يـمكن تـجي رمـية ومـن غير رامي
تـنقذ خـفوق(ن) دعـوته مـستجابه
والـشوق يـلعب مثل لعب الحرامي
مـحـدن سـلم مـنه...ولا صـك بـابه
والـقلب مـثل الـلي ذبـحه الخرامي
وده بـقربه مـيـر مـحـدن درا بــه
؛
ريوف

[الشامخه]

‏الحياه دروب ، واختار الطريق
‏اللي ما يحدّك على الضيقه ابد
‏/
‏صير مثل البحر : من خارج انيق
‏وداخلك عالم ما يدري بّه : احد

[عذب]

محمد العواد وريوف لاهنتوا وصحت ابدانكم والسنتكم وماعليكم زود الشامخة صح ذوقك وتسلمين على التواجد الجميل وتشرفت بردودكم وتفاعلكم تحياتي لكم

لاتفضحون السر خلوه كامي
بين الضلوع العوج محد درابه
الي ذبحه التيه يعرف مرامي
يجمع ويطرح لين يعرف حسابه

عذب

[الشامخه]

صح بدنگ ي عذب وصح بوحك ..
ابيات جميله ربي يسعدك..
‏هالشهر ميزته بين اعكتاف وسهر
‏فيه ليله فضيله تجمع اجر وسلام
‏ليلة القدر .. تفرق عن ليال العمر
‏الله يكتب لنا فيها .. صيام وقيام
‏.
‏

[عذب]

الله يثبتنا على الحق والدين
يوم العقول بمحشر الخلق تهتال
ونحشر مع اصحاب التقى والنبيين
ويكتب لنا في جنة الخلد منزال

بوحي

[صـدووودٓ]

ღ

في طرف صدري بقآيآ من حنين
وإن بغيت الصدق كلي حن لك

ماهي سالفة شوفني بعدك حزين
بس ليه تروح وفيني شي لك !

[خيال مطير]

يا تاج راسي حنين الوجد متعبني
ويشد فكري هواجيسي بعثراتي
وارد نفسي عن الهفوه وتاخذني
موانئ الشوق من موجات وناتي
لوان قلبي على فكري مناسبني
ماشفت عذب الكلام يرده اسكاتي
احبها والهوى ماهو موافقني
لو وافقتني ظروفي في مناجاتي

[الشامخه]

‏"
‏
‏ياشينها لا صرت طيّب على طول
‏وتظهر رضا نفسك وتخفي زعلها
‏/
‏وقلوب بعض الناس تحتاج ديتول
‏يقتل / جراثيم / الحسَد ويغسلها"

[محمد الغنامي]

الـغيـاب يتـعب القـلـب ياشــين الغياب
وانـتـه اللي كـل ماغــبـت ياقـو تعـبي
اشهد اني منــك يازين قاسيـت العذاب
وانت قدرك داخل القلب في سد شنبي

[الشامخه]

‏-
‏
‏اللي يعزك
‏مايشوف الرداء فيك
‏ومن يكرهك
‏حتى بخيرك يذمك
‏/
‏ترضيه ماترضيه
‏ماهو ب راضيك
‏لو هو من اقرابك
‏ولحمك ودمك

[محمد العواد]

ارتاح لك يانور عيني واحبّك

وانا مدامك حولي اليوم مسرور



يشهد على ماقلت ربي وربّك

في كل ديرة وين مارحت لك نور


محمد العواد

[ريوف]

رد على ابيات محمد العواد...

خل الوصل مابين قلبه وقلبك
مابينكم شين محرم ومحظور

يمشي مع الأيام في نفس دربك
حتى ولو هو كان بالحيل معذور
؛
ريوف

[الشامخه]

‏-
‏
‏ما يعزك في زمانك وأنت حيّ
‏غير طيبك عند ربعك ياا بعدي
‏/
‏ولا يذلك في زمـانك غير شي
‏حاجتك لا جات في كف الردي

[محمد العواد]

ريوف
صح لسانك يالشاعره
مااقول الا الله يسعدك ياشيخه

[الشامخه]

‏ليت عيني تشوف اللي بوسط القلوب
‏لاجل اميّز مكانة صاحبي من عدوّي
‏.

[محمد العواد]

السموحه ياحبيبي من القصور

جيتك اجبر خاطرك واطلب رضاك


والله اني يوم احبك معذور

وعند روحك والله ان روحي فداك


محمد

[الشامخه]

‏فالصدر شرهة حب واشواق وشجون
‏تغلغلٍ .. وسط الشعور المقيّد
‏الحُــب ♡ ماله عيــد .. ياللي تحبون
‏اللي حبيبه معه .. دايم معيّد
‏.
‏

[محمد العواد]

حان الوداع ووادع القلب غاليه

أقفى يقول اني على البعد مجبور


يقول لو غيرك من الناس مابيه

قلبي على الفرقا مسيّر ومامور


قلت اطلب الله لك من اليوم وادعيه

يستر عليك ويجعلك دوم مسرور


محمد العواد

[الشامخه]

‏����
‏ يا ليتنا نرجع مثل أول أطفال
‏طُهر وبراءة ما بنا ظن كافر
‏اللي يزعلنا يرضينا بِ ريال
‏واللي توفى نحسب انه مسافر

[عذب]

يامهمهي البيد حفين الأقدام
وانا زهابي مايكفي دروبي
باقي على الطرقة مسافات وايام
متساوي عندي شروق وغروبي
عطشان والعطشان ماهوب يلام
ومن الضما كبده خطير تذوبي
شاف السراب يلوح للعين قدام
اثرالسراب الي نده له كذوبي
وصله وطاح وفوق خد الثرا نام
له مدة تسفي عليه الهبوبي
واليوم صار لسكة التيه مرسام
الله يرحم طيبين القلوبي

نبضي

[الشامخه]

‏سهران ياصاحبي وانا ضايق البال
‏صديت عن كل المخاليق مهموم
‏.
‏تطري علي ايام واحلام وآمال
‏الله يالدنيا جفت عيني النوم
‏.

[محمد العواد]

لو غبت لحظة كل مابي تمنّاك

صعبه حياتي ياحياتي بدونك


أهيم في صوتك وهمسك ولقياك

حتى مع الاحلام مااقدر اخونك

[الشامخه]

‏الضيقه اللي مالها عذر واسباب
‏ماهو صحيح اتجيك من دون سبه
‏
‏ اما من الايام او غدر الاحباب
‏والا قصور العبد في حق ربه

[عذب]

http://www.hamsatq.com/kleeja/uploads/1404147562131.jpg
يا اله الكون يارب الانام
ياعليم وياعظيم وياحليم
تقبل الطاعات في شهر الصيام
وتغفر الزلات في الشهر الكريم

بوحي

[الشامخه]

‏تدري متى تنبسط وتحس بالراحه؟
‏لا قامت امك على ممشاك تدعيلك ..
‏.
‏هذي ترى جنتك والبر مفتاحه
‏اسعى ورى جنّتك لا يرتخي حيلك
‏.
‏⁧‫

[محمد العواد]

تدري ان غيرك مايناسب مزاجي
وقبل اعرفك ماذقت طعم الوناسه

اغليك و حبك داخل القلب لاجئ
لاجئ غلا ماهوب لاجئ سياسه

[الشامخه]

‏الناس واجد و فرق الناس متوفر
‏تشوفها في حياتك شبه / يومياً
‏.
‏وجيه لا شفتها لا بد ،،،، تستغفر
‏و وجيه لا شفتها ،، ترتاح نفسياً.

[محمد العواد]

مافيه غيرك يشبهك في حلاتك
إنت القمر وأنا حياتي أسمّيك

أنا حبيبي لو بعدد صفاتك
مابه عظيم إلا لقيت أكثره فيك

[الشامخه]

‏الجمال بمكه‬ بهذا ... الشهر
‏والليالي العشر تكسوها جمال
‏
‏مثل قطـرات الندى فوق الزهر
‏تلهج قلـوب البشر بـ الإبتـهال
‏
‏⁧

[عـزف~]

تمرد افكاري يسافر بـي علـى جنحـان طيـر

حتـى يوصلنـي مجـرات السمـا واجرامهـا

راسي هناك وألف كوكب حول راسـي تستديـر

متفاوتة مابيـن كبـر وبيـن صغـر احجامهـا

مالي مساحة تحتويني من هـذا الكـون الكبيـر

نفسي تمرجح بيـن واقعهـا وبيـن احلامهـا

اثر البشر ماردها عـن حـق تحديـد المصيـر

الا مسافـة حـرف بيـن آمالـهـا وآلامـهـا

[محمد العواد]

وين انت ياللي كل ماغبت وابطيت

يضيق خلقي ويتعكّر مزاجي


نديم القوافي

[سمو الحرف]

عيدك مبارك ياأجمل من سكن وجداني
كل عام وانت أغلى من يمـر طاريـه

[عازف الشوق]

مر رمضان بلذته واقبل العيد
ويارب تقبل من عبيدك صيامه
عسانا نصومه كل سنه بخير ويعيد
واحبابنا معنا بخير وسلامه..

[عازف الشوق]

العيد تفرح به صغار المواليد
ضحكاتهم باالعيد اكبر علامه
لانقشت كفينها شيخه الغيد
وضافت من الفتنه وحطت لثامه.

[ملكة الرواسي]

‏لو كل من هو تمنى شيّ ياتي له ؟
‏صرت أتمناك في حلي وترحالي

[عذب]

http://ser1.almlf.com/i/00007/c4i87e70ddvu.gif (http://ser1.almlf.com/i/00007/c4i87e70ddvu.gif)
ياوطنا للفرح البس جديد
افرح بعيدك عقب شهر الصيام
جعل عيدك يالوطن عيد سعيد
وياعساه يعود لك في كل عام
بوحي

[الجووهره]

صح لسانك عذب

وكل عام وانت بخير

والوطن بخير

والجميع بخير

[الجووهره]

كل عيد لي مع
همس صوتك مواعيد
من قــبل لا آعــايد ولا يعايــدوني

كل عـام وانت
فرحه العيد بالعيد
وكل عام وانت ساكن في عيوني

[عذب]

قل للسما وين النجوم السهيرة
محتاج اسامرها على جمر الأشواق
اشوفها عن مجلسي مستخيره
حطت بياض الغيم من دونها رواق
قولوا لها دمع العنا تستعيره
وتسلفه غيم على الخد دفاق
واليا وقف سيل العيون الغزيرة
خلوا نجوم الشوق تنظر لمشتاق

بوحي

[رحيل]

من يوم قفيت عني .. يالله الخيره

[عذب]

الا يازاير عيون المسا والليل له جذاب
انا مثلك تراني اعشقه هالليل واحيا به
اسامر نجمة تسهرواحاتي غيبة الأحباب
اسلي خاطر يسهر حزين وفاقد احبابه

عذب

[محمد العواد]

لاتلتمس بين الغلا والمحبه


اختار بين اغليك ولا احبّك



نديم القوافي

[رحيل]

نمشي على النيّات وقلوبنا بِيض
وربي على حسن النُوايا رزقنا

ما نخلف النيّه ولا نحمِل الغيض
ولانخضع .. إلاّ للّه اللي خلقنا

[الجووهره]

لو خسرت الأمس كمّل من جديد
العوض قدّام .. و الماضي فدى♡

[النجلاء]

يامهمهي البيد حفين الأقدام
وانا زهابي مايكفي دروبي
باقي على الطرقة مسافات وايام
متساوي عندي شروق وغروبي
عطشان والعطشان ماهوب يلام
ومن الضما كبده خطير تذوبي
شاف السراب يلوح للعين قدام
اثرالسراب الي نده له كذوبي
وصله وطاح وفوق خد الثرا نام
له مدة تسفي عليه الهبوبي
واليوم صار لسكة التيه مرسام
الله يرحم طيبين القلوبي

نبضي

الله الله
ياسلام عليك وصح الله لسانك ياعذب
رآآآآآآآآآئـــــــــع

[عذب]

النجلاء صح بدنك ومشكورة على الإعجاب والإشادة

ياليل لوتسمح ابسهرك وحدي
ودي افضفض لك من الراس للراس
ودي اغني لك من الحان وجدي
من هاجس يكتب عن الشوق باحساس
وان كان سال الدمع من فوق خدي
تعال وامسح دمعي وقول لاباس
مغير لك ياليل بيحت سدي
حذارك يدري به غشيم من الناس

بوحي

[النجلاء]

صح الله لسانك ملايين ياعذب
مبدع الله لايضرك

[الشامخه]

[size="7"][‏جيتك سحايب حبّ واشواق واحساس ‏جيتك قصـايد .. تحتوي كـلّ ذاتي ‏ ‏جيتك لأني شفت فعيونك الناس ‏واصبحت ناسي والاهـمّ في حياتي/size]

[محمد العواد]

يا صاحبي جيتك و انا حيل مشتاق

عيني تبي شوفتْـك يا نور عيني


ما انساك والله .. لو حصل بيننا افراق

حبل الوفا ممدود بينك و بيني



نديم القوافي

[رحيل]

يالله بتذاكر سفر ومصروف
لـ ديرتن ماخذ القلب غلاها

[محمد العواد]

انا ترى ماارتاح اذا منت مرتاح

راحتْـك لي يانور دنياي،،،راحه


يافرحة ايامي عسى ايامك افراح

ماعاد في قلبي لغيرك مساحه


نديم القوافي

[بوح شاعر]

‏لو حصل من بيننا صد وجفا
‏شمس حبّك عن عيوني ماتغيب
‏في حنانك يابعد عمري دفا
‏وكل جرحن لانظرنالك يطيب

[عـزف~]

غلطان من هو ياخذ الحيات في وسـط الجيـوب . . . يسري يلاعبهـا وطعـم المـوت بيـن أنيابهـا
ياملاعب الحيات ينفث سمها مـن كـل صـوب . . . وإن قلت بأقطـع رؤسهـا لفـت عليـك أذنابهـا

[ريوف]

راقت لي ابيات استاذ عزف وذائقته...
فرديت عليها...

لا تـحـسـبنه لادرى بـالـشـر يـحـتـاط ويــتـوب
مـسـتامن(ن) مــن غـدرهـا وان آقـبـلت مـا هـابها

لا هو على لعب(ن) بها مرغوم ولاهو بمغصوب
الـناس مـن كـثر الـفضاوة مـادرت وش صـابها
؛
ريوف

تحياتي

[النجلاء]

صح لسانك ياعزف
وصح الله لسانك شاعرتنا ريوف ع المجاراه

[عـزف~]

صح لسانك ريوف احستِ وربي .

أنا على طرفي نقيض أكسب رجل وأخسر شعوب . . . تبلانـي الأيـام وأنــا مابحـثـت أسبابـهـا
أكبر ذنوبي عاقد العـزم أبتعـد عنهـا وأتـوب . . . وأصغر ذنوبي ماقدرت أحيـا وأعيـش إلا بهـا

[ريوف]

صح لسانك ريوف احستِ وربي .

أنا على طرفي نقيض أكسب رجل وأخسر شعوب . . . تبلانـي الأيـام وأنــا مابحـثـت أسبابـهـا
أكبر ذنوبي عاقد العـزم أبتعـد عنهـا وأتـوب . . . وأصغر ذنوبي ماقدرت أحيـا وأعيـش إلا بهـا


صح قلبك عزف..تسلم من ذوقك ياخوي

واسجل حظوري ...


بتتمة المجاراة


وانـا لـياشفت الـسما تـمطر شعر وسط القلوب
جــيـتك آعانقها وانـــاااا هــايـم بـريـح تـرابـها

اجمل مكان(ن) شاقني صادفته بوقت الغروب
والـشمس لـو غـابت عـلي ..مـالي جدا بغيابها
؛
ريوف

[ريوف]

صح لسانك ياعزف
وصح الله لسانك شاعرتنا ريوف ع المجاراه


صح قلبك يالنجلا
لا عدمنا إطلالتك الرائعة
...

[الجووهره]

صح لسآنك عزف

صح لسآنك ريوفه

أبدعتووو

يعطيكم العآفيه

[عـزف~]

صح بدنك يالجوهره وصح لسانكٍ ريوف رائعه واكثر ماشاء الله عليك
.
.
ياليتنـي قبـل أختلـط بالنـاس فتشـت القلـوب . . . وعرفـت وش تخفـي ورا جدرانهـا وأبوابهـا
ماكان سجيـت القـدم فـي جرهديـات الـدروب . . . وإلا ورطت الورطـه إللـي ماحسبـت حسابهـا

[عذب]

كم واحد في عالم الحب مادش
نفسه كريمة بالمشاعر والإحساس
ماباق احساس ومشاعر ولاغش
متعــود صـدق التـعامل مع الناس
ماهوب مثل الي عطاياه مابش
يبخل وفيه من الأحاسيس اكداس
عنده مشاعر مار ماكن عندش
كنه بسوق العاطفة معلن افلاس
المسألة ماهيب درهم ولا قرش
نبض حبيس البوح مابين الأنفاس
وان كان عيا البوح للنبض ينعش
تلقى اكسجينه بين حبر وقرطاس
بوحي

[ريوف]

صح بدنك يالجوهره وصح لسانكٍ ريوف رائعه واكثر ماشاء الله عليك
.
.
ياليتنـي قبـل أختلـط بالنـاس فتشـت القلـوب . . . وعرفـت وش تخفـي ورا جدرانهـا وأبوابهـا
ماكان سجيـت القـدم فـي جرهديـات الـدروب . . . وإلا ورطت الورطـه إللـي ماحسبـت حسابهـا

صح فلبك يالجوهرة تسلمين غاليتي...

وصح لسانك ياعزف....ابيات من قصيدة رائعة ذات معنى ومغزى...


واقول....



يـاصاحبي لا تشتكي قلبك على شخص معيوب
الـيـا ابـتـعد عــن دنـيـتك حـتى الـفضايل عـابها

محدن درى وش علته يمشي في دنياه ويجوب
الله عــلــى كــــل الـبـشـر بــيـده زمـــام رقـابـهـا
؛
ريوف








استمتعت بالمجاراة...
شكرا عزف
تحياتي
ريوف

[ريوف]

كم واحد في عالم الحب مادش
نفسه كريمة بالمشاعر والإحساس
ماباق احساس ومشاعر ولاغش
متعــود صـدق التـعامل مع الناس




الله عليك...
يااااسلااام..
ابداع حد الامتاع ..عذب
وابياتك عذبه..
صح لسانك شاعرنا القدير
تحياتي
ريوف

[محمد العواد]

بعض البشر في شوفته فلة حجاج

وجهن مثل شروا الوجيه الفليحه


وبعض البشر ياجاك سبب لك ازعاج

ودّك على فرقاه تذبح ذبيحه


ماتلام لو بدّلت رفحاء بالافلاج

وغيرت عنوانك ورقم الشريحه


نديم القوافي
محمد العواد

[رحيل]

طال الجفى وابغى من الحظ وقفـه
راحت سنين العمر واحبابي بعاد

[ملكة الرواسي]

يا شين طعم الصبر لا صرت مجبور
تصبر ولا تدري وش الايام تعطيك

[الجووهره]

هذي هي الدنيا متاهات وأحزان
كلن يــــــدور راحته ما لقاهـــا

تبي لها صبر مع شوي نسيــــان
مع ضحكة تخفي دموعك وراهـا..

[رحيل]

يا صباح الخير والدنيا عوافي
ابتسم وابدأ صباحك وانت رايق

دامها تشرق ودام الجو صافي
اذكر الله واشكره لو كنت ضايق

[عـزف~]

مركب .. وهم ازرق وموج من الوريد الـى الوريـد

رحلة .. لكشف الذات مـا بيـن الجهـات الاربعـة

اول .. شعاع الشمس صحوة وآخره .. جثة شهيـد

والبحر .. يبكي شايـل الجثـة علـى راس اصبعـه

على .. امل قطع المسافـة .. لكـن المرسـى بعيـد

والريح تعزف داخـل اعماقـي .. أنيـن الأشرعـه

[ريوف]

مركب .. وهم ازرق وموج من الوريد الـى الوريـد

رحلة .. لكشف الذات مـا بيـن الجهـات الاربعـة

اول .. شعاع الشمس صحوة وآخره .. جثة شهيـد

والبحر .. يبكي شايـل الجثـة علـى راس اصبعـه

على .. امل قطع المسافـة .. لكـن المرسـى بعيـد

والريح تعزف داخـل اعماقـي .. أنيـن الأشرعـه



ابيات اكثر من رائعة..
صح لسان شاعرها..وناقلها
تسلم عزف..ولا هنت
تحياتي
ريوف

[خيال مطير]

يايمه ارجعي كافي ابجلس معك لـو لحظـات
واقبل ايدك ورجلك وافرش لك رمش عينـي
يايمه ما تحملهم يقولوا فات مـا قـد مـات
تعالي غيري هالقول واطيعـك باقـي سنينـي
واترك عادة التدخين وانفذ ما تبـي بسكـات
واصلي الفجر في المسجد قبل منتي تصحينـي
يايمه ارجعي تكفين وطفـي شمعـة الآهـات
ابيك انتي ولا غيرك علـى موتـك تعزينـي
وضميني وداويني مثل مـا كانـت الهقـوات
ما ابي احدن يواسيني ابيـك انتـي تواسينـي
دخيلك بس لا تبكي اذا شفتي بي الدمعـات
انـا مقـوى ابكيـك اذا انتـي تبكيـنـي

[ريوف]

وضميني وداويني مثل مـا كانـت الهقـوات
ما ابي احدن يواسيني ابيـك انتـي تواسينـي
دخيلك بس لا تبكي اذا شفتي بي الدمعـات
انـا مقـوى ابكيـك ... اذا انتـي تبكيـنـي





ابيات رآئعة..عن الام والاشتياق لها..

الله يحفظ امهاتنا وامهاتكم
ويرزقهن برنا
آمين

[محمد العواد]

وين امي اللي كل ما ابطيت بغياب

تلوج ما تغمّض بنومه ثواني


يمه فراقك حط بالكبد مخلاب

توفّت آمالي و كل الأماني


في غرفتك ياشفت بالغرفه اطياب

اضيق من ذكرى وداعك واعاني


نديم القوافي
محمد العواد

[رحيل]

اقنع بحالك والظروف المحيطه
دام السعاده فالرضا بالمقادير

بسيط واحب الحياه البسيطه
خلك على ذا القاعده وابشر بخير

[محمد العواد]

في غربتي عانيت من بُعد الاحباب

مع غيرهم قانع بغير القناعه


كنّي غريب الدار بديار الاجناب

جالي وهو مطلوب عند الجماعه


نديم القوافي

[رحيل]

ياخذهم الوقت و مَا ياخذهم الطاري
يبقى لهم ف الأماكن ضحكة و سيرة !

[محمد العواد]

المشكله ماهي غياب الحبايب

المشكله ياشفت لاحبابك اشباه


نديم القوافي

[رحيل]

اجمل الأشياء نلقاها بالصدف
والفرح دايم وراء الصبر الجميل

[محمد العواد]

الصاحب اللي غاب وابطى غيابه

ماخلا بقلبي لغيره مساحه


نديم القوافي

[ريوف]

مشاعر الأحباب ماهي رخيصة
تبيعها ياشفت لك حب دافي

لو كانت إعيونك عليهم حريصة
تبقى على عهد المحبين وافي

المشكلة ياخوي ماهي عويصة
احساسهم لو ماا يقولون كافي
؛
ريوف
وطن الإحساس

[محمد العواد]

الصاحب اللي بالمحبه شراني

يحرم علي لو بعت روحي ماابيعه


نديم القوافي

[رحيل]

وشلون أدور لي على قلب خالي
لاأقفى كريم العمر واقبل شحيحه

أجساد منهكها حنين الليالي
وقلوب يا متوالفه يا جريحه

[محمد العواد]

اليـوم قلـبـي يـــوم صــار بيـدينك

صار التواصـل بيننا شبه معدوم


وانا مـن اول حـرف بـيـنـي وبينك

ماطيق بُعــدك يا حياتي ولا يـوم



نديم القوافي

[عذب]

ان كان عشق العطر في قلبك يزيد
صافح عبيره والغلا لا تكمه
وش فايدة عطر تشمه من بعيد
رشه على راحة يدينك وشمه

عذب

[رحيل]

لا سكر الله باب يفتح لنا أبواب
واليا ظلمونا خلق سخّر لنا خلق

حكمه من الرحمن وأحكامه أسباب
حتى نعرف الناس ونميّز الخلق

[محمد العواد]

عندي مشاعر مالها اي تفسير

وان كانها فعلا مشاعر محبّه ؟!



مافيه (غيرك) تلّ قلبي من الغير..

وخلاني اعشق شوفته دون سبّه


نديم القوافي

[رحيل]

هجس ٍ رمع ماله عن القلب فراع
دايم بغاراته يشن المفازيع

مركز بنوده بين محني الأضلاع
ليا ناموا العربان سوى مشاريع

[عذب]

اخاوي الغربة وممشاي ترحـال

وانا رفيق الليل فـي كـل حـزة

واناغريب الدار ما نيـب نـزال

ارسم وجودي في شموخ ومعـزة

بوحي

[رحيل]

يالله ترزق كل ضايق ومحتاج
ياخير من يسأل ويا أجود من أعطا

تشفى مريض ما لقى طـب وعـلاج
وتغفر لمن طاوع هوى النفس وأخطا

[غزلان]

. ‏.
‏.
‏لك وحشةٍ ميعادها تالي الليل،،
‏لا نامت عيون البشر زاورتني.!

~ مما راق ~
‏
‏⁧‫

[الشامخه]

. راس يبادلك الوفا حبّ خشمه
حطه على يمناك وارفع مقامه
;و راس يقلل قيمتك لا تحشمّه
. لو زان في وجهك لقاه وكلامه .

[محمد العواد]

مبدا الوفا هو ساس قصر المحبّه
لولاه مبطي كان شفت انهياره

[عـزف~]

زادت علامات التعب بديار وجه الصامديـن
وطال الكلام وبعض خلق الله طال سكوتهـا.

تبحر سفينه فوق كف البحر والموج اللعيـن
الريح تدفعها وموجـات البحـور تشوتهـا.

لكن على الله ياصل الركاب فيهـا سالميـن
من بحرها من موجها ورياحها مع حوتهـا

[عذب]

يالهفتي طلي على الزين بسكات
لاتزعجـينة بس بشــويش طلـي
واليا انتبه مسيه بأحلى مسائات
مع رايق البوسه على خد خلي

بوحي

[رحيل]

أبتسم في وجه الايام والكون الوسيع
القدر ماأنت بـمغيره لو تحبي حبي

لا تحمّل نفسك أكثر من ما تستطيع
من ترك لله أمره عطااه اللي يبي

[عذب]

يعيش راسك ياعــطر ليـلة العيد
وش تنتظر ماعــــاد للشوق ذمه
ماعــاد باقي للمــواعيد تجــــديد
لمــــلم رذاذك مـــن ثيــــابي ولمـــه

بوحي

[الجووهره]

‏حـاول تميــز في طبوعك وتختار
‏احلى الطبوع اللي لها قدر وثمن
‏
‏ثلاث تجعل لك مع النـاس مقدار
‏اسلوبك وطيبك مع الخلق الحسن

[الشامخه]

‏يابهجة الخاطر وياغايت الروح
حالي براها الشوق ومكابد الهم

همٍ يضايق خاطري وين ماروح
واليا شكيت الهم قالو توهم.

[محمد العواد]

إما نكون اثنين من دون ثالث

ولا بلاش من الهوى والمحبّه


نديم القوافي

[عذب]

مكن اسوي بعض الأحيان مادري
يعني اجــاري من يعيشـون حــولي
ماودي اكشف للمــلاقيف ســــري
حتـــــى ولا ودي افــــرح عــذولي
بس انت لوتدري وش الي بصدري
ان كان تعذرني اذا ضــاق جــولي
تقتلني الأعــذارواعطيـك عــذري
حــواجز الأعــذار تمنــع وصـــولي

بوحي

[رحيل]

الولد بكره مع الايام والد
والعمر يجري ومافيه استراحه

إدمح الزله ترا مافيه خالد
كلنا بنموت وتعيش السماحه

[عذب]

هـلا بك والخفوق الي تعلق بالهوى نـاداك
بعد ذعذع هبوب الحب والأشواق تسري به
تعال وعانق اطياف الغرام الي لها مسراك
وعطني من حلا وصلك مادام الحب تدري به
من بوحي

[الشامخه]

‏على دموع السما تضحك زهور الربيع
‏والناس لولا الأمل ضاقت بها أوطانها
‏ٰ
‏الطير لولا التفاؤل ، بالبصير السميع
‏ما رفرفت بالسـمــا ، تمـرح بجنحانها

[الشامخه]

‏على دموع السما تضحك زهور الربيع
‏والناس لولا الأمل ضاقت بها أوطانها
‏ٰ
‏الطير لولا التفاؤل ، بالبصير السميع
‏ما رفرفت بالسـمــا ، تمـرح بجنحانها

[عذب]

ماني لأحد يالي بتشريني انا ماني لأحد
انا الذي حريتي ترفض سجونك والقيود
لا تحسبني في الهوى اركض ورا الي يبتعد
ماني من الي خافقه سلعه ويطلب من يزود
لكن انا ياجاهلي مملوك للفرد الصمد
الخالق الي في يده حكم البشر بيض وسود
بوحي

[رحيل]

خلك ضحوك لو ملآ الدمع عينك
كآبر وسآير دنيتك لو تردت

[محمد العواد]

اصبر على الشدّات وقت الشدايد

واجرك على اللي للمخاليق معبود


نديم القوافي

[رحيل]

ولا يوجعك كون الجفيا بلا تبرير
الا جات من شخصٍ تداريه وتحبه

[رحيل]

آسمها دنيا ولا فيها كبير
الكبير الله و لاغيره آحد

في نهايتها الغني مثل الفقير
كلهم نفس الكفن نفس اللحد

[ريوف]

والله انّي من حنانك ماشبعت ولا ارْتويت
إنْدِفَن نَبْع المحبّه....قبل مَا مِنْه آرْتِوي
؛
ريوف

[عذب]

تخيل تمطر الغيمة وحنا بحضنها غافين
يمازحنا رذاذ الما ولا نستغرب امزاحه
تخيلنا مع النسمة على كف الندى لاهين
نغني للغرام اللي ملكنا عالم افراحه

خيال عذب

[محمد العواد]

ان كنت تجهل قيمتك عند مغليك
افطن وتلقاها بزود اهتمامه


نديم القوافي

[عذب]

على جرح الشعو الي سكن في داخل الوجدان
ودمــع بــلـل كــفــوف الــــوفـا والــطيب هـليته
سكت ولا لقيت لخاطري اريح من الكتمان
يمــــوت الــــسر في قـــلــبي ولا للنـــاس بـديـتــــه
اعــــالج جـــرحـي بيــدي ولا اشره عــلى انسان
كـــذا ارتـــاح لـه صـمت بوسط الروح ربيتـه

بوحي

[رحيل]

ما اقول قلبي معك يشعر بارتياح
اقول قلبي لا يطير من الفرح

الليل مع جيتك في عيني صباح
والصدر بعد الضيق والهم انشرح

[جوري]

باقي معي أغلى هديـه تهمـك
صورتك كاتب فوقها مقدرأنساك

[عذب]

ماعاد باقي لي مشاريه وعتاب
خلاص يكفي ماحصل يازماني
اريح لي انسى الحب واسكر الباب
واحبس عظيم الشوق بين المحاني
مادام صدق البوح مابيننا غاب
تبقى المشاعر من مرضها تعاني
صرنا نعيش العاطفة مثل الأغراب
الــين مـاتـت في هــوانا الأمــاني

عذب

[رحيل]

الله يطول بعمري و أخدم إحساسك
وإلآ خذي العمر يا يـمه بلآ منه

والعذر لو أحضن رجلك قبل رأسك
عطرك طبيعي و رجلك ريحة الجنة

[الجووهره]

كلآمك أجمل من سكوتك إذا طآل
اسمعك باحساسي ويضحك خفوقي

شفت المطر ، لابلل وجيه الأطفال
يشبهك ، ، لابلل كلامك . . عروقي

[رحيل]

اخاف احبه وابتلش في فراقه
وانا على وصل المحبين ماخنت

مدري علاقة حب ولا صداقه
بس الوكاد اني على نكه ادمنت

[الشامخه]

‏خلك على النيه تجيك التوافيـق
‏لـو أغلب قـلوب المخاليق ظـلمـا
‏،
‏اللّه يبل الريق في حزة الضيق
‏لآ شحت كفوف المخاليق بالمــا.

[الشامخه]

‏خلك على النيه تجيك التوافيـق
‏لـو أغلب قـلوب المخاليق ظـلمـا
‏،
‏اللّه يبل الريق في حزة الضيق
‏لآ شحت كفوف المخاليق بالمــا.

[محمد العواد]

تدري وش اللي مايخليني انساك ؟!

صوره معي ما فارقتني دقيقه



نديم القوافي

[وافي الحرف]

يزين الكيف لامن على الفكر مريت

يطيب خاطري وينزاح هماً براسي

توقيعي

[عذب]

ياقلب يالي من غثا الوقت مللاع
اصــبر وصــابر لـو الايــام تقسى
بكـره يـزول الهم وتزين الاوضـاع
ويطيب فال النفس والقلب ينسى
وتستسلم الأجـفان للنــوم هـجاع
وتنـام ليـنه يكشـف الليـل شمسا
وان كان شح الوقت والحظ ماطاع
اصـبروتلقالك مـع الصـبر مـرسى

بوحي

[الشامخه]

‏العمر راح اكثره ما باقي الا القليل
‏والمشكله كل يوم تقول بكره تتوب
‏تغانم الوقت قبل يصير جسمك هزيل
‏وتطير ياصاحبي بكره مع اول هبوب

[رحيل]

يالله ياعالم خفيات الاسرار
ياواحد(ن) كل الخلايق ترجاه

ياعالم سر الخلايق والاعمار
والعبد ما يدرى عن أقصاه وأدناه

[محمد العواد]

تعال انا محتاج لك حيل وين انت
مازلت زي ماكنت محتاج لك حيل

تعال ياللي بحرفك ابدعت واحسنت
نبي على شعر الغزل نسهر الليل

نديم القوافي

[رحيل]

يالله يا عالم بخفيات الاسرار
يا وحادن فردن عليه اتكالي
انك توفقنى توافيق الاخيار

[عذب]

تموت الآه في قلب الحزين وماحكى سره
ونار البعد مابين الضلوع العوج اجاجه
تحمل صد احبابه ونار الشوق في صدره
كتم سرالغرام ولاحكى عن حاجته حاجه
قضى صبرالصبوروما قضى من هجرهم صبره
قوي عزوم ياقلب يبي من صبره افراجه

بوحي

[رحيل]

يا رب جنبني دروب اﻟعواجه
أنت البصير المعطي القادر الحي

مادام مالي من ورا الناس حاجه
لاتجعل بقلبي سوى هيبتك شي

[محمد العواد]

‏
اللي تحـبّ ولا يقـدّر محبّـتْـك

‏احجز له و فيّز خروجه نهائي
‏
‏"نديم القوافي"

[الجووهره]

الناس والدنيا .. منازل .. بلا ساس
ورحيلها .. وان طولت .. مقتفيها

هذي هي الدنيا وهذي هي الناس
خسران من علق هقاويه .. فيهاا

[ملكة الرواسي]

لو تدري البارح انا وش حصل لي
فزيت من نومي ادور واناديك

واقفيت وقلبي تله الشوق تلي
والروح تنزعها معك في خطاويك

[محمد العواد]

ياقلب وش حدّك على حب مخلوق

تغليه و يبادل غلاك بغيابه


نديم القوافي

[عذب]

للمسا في عينها قصة حنين
سالفة مابين نجمات وقمر
الضيا من خدها نوره يبين
والشفايف ماخذه لون الجمر
بوحها يفرح به القلب الحزين
غنوة يحيا بها ليل السمر
ياحكاية ضمها حضن السنين
ما أمل فصولها طول العمر

بوحي

[رحيل]

لاصاقت بعينك قل الحمد لله
حمدٍ يليق بكبر فضله وجوده

الحمد للي ما تعدد عطاياه
والشكر للي من شكر له يزوده

[محمد العواد]

يا جعلني بينك وبين المضرّه

من غزة الشوكة الى سكرة الموت

[رحيل]

علموه يروف بي كان له قلبن بصير
وان تعذر بالمروفه فـ حيل الله قوي .
ㅤ

[محمد العواد]

ابسألك وابغى لسؤالي إجابه

وش دافع وجودك معاي ووجودي ؟!


"نديم القوافي"

[محمد الغنامي]

ان كان ماشفتك تشين اخلاقي
وان ماسمعتك تتعب .النفسيه
يعني بدونك مابقالي... باقي
وانتي بدال الاجراخذتي سيه

[عذب]

على رحلة شوامخ عزتي يم الفضا رحال
مدام ان الفضا واسع وصدر الكون يحويني
ابرحل والفجوج الواسعة تستهوي الرجال
ابرحل دامها ضاقت مساحات الأمل فيني
ابرحل وانت ياقلبي تعال وعانق الترحال
تعال وخلنا نبعد ولانترك عناويني
تعال نسابق الخطوة ولو ان الدروب طوال
مدام ان الثمن عزة ولاغيرك يخاويني

بوحي

[الجووهره]

لآ تنَتظر منَ ( فآقدَ العقل ) حكمَه ! ..
ولآ تنتظرَ منَ ( فآقدَ المرجلهَ ) خيرَ .. ...

ولآ يغركَ فيَ ( الرديَ ) لمعةَ إسمهَ
الريشَ مآطيرَ ( النعِآمهَ ) .. وهيَ طير

[خيال مطير]

نفسك لا تظلمها ولا تظلم الناس
... واليا نطقت..! الناس لا تبتليها
مثل ما فيك احساس للعالم احساس
... والناس مثلك، مثل ما فيك فيها

[رحيل]

ياعظيم ويا كريم ويامعين
لا اله الا انت ربي ذو الجلال

عاف مرضانا ومرضى المسلمين
وارزق المحتاج بـ الرزق الحلال

[محمد العواد]

يا غايبه لو غاب زولك عن الشوف

ما غاب طيفك عن خيالي دقيقه


كتب لك من صادق احساسي حروف

وبخاطري من ضيقة الخلق ضيقه


نديم القوافي

[الملكية]

يـا رب جـنـبـنـي دروب العـواجـه
. أنت البصير المعطي القادر الحي
مادام مالي مـن ورا الناس حاجه
. لاتجعل بَ قلبي سوى هيبتك شي

[عذب]

الا ياحظي المقفي عن دروب الرجا لاباس
تحيزم وانتخي في همتك وايديك بيديني
نويت امشيك يادرب الأمل واطوي حصير الياس
ومع درب المنى اركض واحثه هالرجا فيني
لعل اوصلك ياغاية رجاي ويصدق الأحساس
مادام انك غديت لرحلتي آخر عناويني
بوحي

[رحيل]

ما ضرنا بعد السماء وإن علت
ما دمت يارب السماء قريب

أتضرنا أبواب خلقٍ أغلقت
والله نطرق بابه ويجيب

[رحيل]

يا كريم الوجه ياغافر الذنب العظيم
رد نفسي عن دروبٍ تزيد ذنوبها

[عذب]

على نزف المشاعروالغلا والشوق ياقلبي
تحمل بعدهم واصبر وسامحهم على الغيبه
وانا ادري كل ماغابوا لهيب الشوق يلعبي
واسلي خاطري يمكن يزين الوقت ويجبه
بوحي

[الجووهره]

تدري وش اللي بالخلايق : يمشيك
ويحط لك بالناس ( قيمه ) و شيمه

طيبك و اخلاقك و صادق : مباديك
ونفسٍ بشوشه بالتعامل حشيمه

[رحيل]

يالله عطفك ولطفك والأجر والثواب
من مبتدا عمري الفاني إلى آخره

خلقتني من تراب ومرجعي للتراب
يارب رحمتك فـ الدنيا وفـ الآخره

[عذب]

يصير كلش لوتبي كلش تراه يصير
لاصارلك همة ومع زود الطموح اصرار
اعزم توكل واطلب الله والي التدبير
لا لا تراخى لا ولا تحتج بالأعذار
واصبر ولاتيأس ترا يأس الفتى تخدير
واقنع برزق كافله لك رازق الأطيار
واحفظ بشكرك نعمتك واياك والتبذير
واطلب من الله الستر يالله ياستار
بوحي

[ملكة الرواسي]

كل ماقلت له يا ابن الحلال المحبة عطا ..! وأنت بخيل
التفت يمي وهو عجل وقال لذة الحب في الشي القلــــيـل

[رحيل]

من اقفى عنك لا تتبعه بالشوق
ولا تحن وكل عرقٍ يحن اقطعه

لو به خير او فيه طيب و ذوق
ما كمل صدوده ويشوفك تتبعه

[عذب]

مادريت ان الحمام الراعبي تبكي لحونه
لين غنى في طــويلات البنــا لحن حزين
كنت اظنه لا تعلى بالحجا تطرب فنونه
اثره الماخــوذ مثـلي بالهــوى حزنه يبـين
لافقد مظنون عينه زادت الفرقى جنونه
من سمع صوته يغني باح بالسر الدفين

بوحي

[غزلان]

‏اللي يعزك مايشوف الردا فيك
‏ومن يكرهك حتى بخيرك يذمك
‏ترضيه ماترضيه ماهو براضيك
‏لوهو من اقرابك ولحمك ودمك..


ابيات راقت لي صح لسانك ي بن سهل ~

[عازف الشوق]

يااغلى من جابه الحظ الجميل وودا
رحت ولا جيت تبقى هيبتك محفوظه
مايبي قلبي سواك ولاعليك مبدا.
ومن بغا ياخذ مكانك فكرته مرفوضه..

[عازف الشوق]

صح كلكك ي غزلان

[عذب]

جاوبيني يالحروف الأبجديه
كان لك قدرة بتغيير الحروف
شيلي حروف الحزن خفي عليه
واكتبيني للفرح حرف عطوف
اشبكيها للعبارات الهنيه
واتركيها داخل المهجة تطوف

بوحي

[الجووهره]

كل دقه قلب فيني لك قصيدة
تكفي الد نيا مع الا حباب غنوه

وكل هاجس ما يجيب الا خيالك
سلوتي بالعمر هي صحوه وغفوة

[محمد العواد]

غبت وغيابي عنْك لظروف واسباب

لا تعتبرها يا حبيبي قطاعه


يا شوق حتى لو حصل مني غياب

انتي معاي (( 24 )) ساعه



نديم القوافي

[ريوف]

مـالـلـحـكـي..بـعد الــجــفـا اي تــبــريـر
الـصـمت فــي بـعـض الـمـواقف كـرامه

احرص على اسرارك ولو هي وسط بير
خـطـامـك إلـسـانك وحـفـظه سـلااامـه
؛
ريوف

[عذب]

نامي على كف العتب والمشاريه
يادمعة سالت من الضيق نامي
لك خـاطرلاضـاق محـد يداريه
حتى ولوسيلك على الخدهامي
تكفين كفي ماك ياعين كفيه
الدمع مايروي كبود الضوامي

عذب

[الجووهره]

أعظم (وجـع) بالحب لا صرت تشتاق ...
لـ اللي تحب ولا أنت قـادر تشوفه!

يكويـك "جمـرٍ" داخـل القلب حرّاق ...
زود ٍعلــى نــاره تهـدّك طيوفه !

لا مـرّ بعيـونك كمـا نـوض برّاق ...
مـالك مجــال إلاّ تســاير ظروفه

ياصاحبـي لـو بينـي وبينـك آفاق ...
نفسي معـك في كـل حالـة شغوفة

[نور]

‏الكلام العذب كله .. خله باكر
‏يمكن الخاطر يروق
‏انا ناسي الحب والله .. ماني فاكر
‏وين دمي من العروق
‏~~البدر~~

[عازف الشوق]

يقول لامن غبت بتحب غيري
قلت الغلا حاجه تجي دون سبه
بس الكلام اللي يدور بضميري
هو فيه احد مثلك على شان احبه..

[خيال مطير]

حلـوة ولا يحتــاج زايــد حــلاوه
يكفيك من معنى الحلا ربع مافيك
زين العرب عادي وزينك نقـاوه
سبحان رب يوم خلقك مســـويــك
أعطاك من زين الحظر والبداوه
تهتي بزينك والبـها صار مطـغـيك
غصنك ليا هب الهوا به طـراوه
والرجل تقصر عنك والنفس تبغيك
انـتي بعـيد عنك معنى القـسـاوه
يافــتـنة كـل الغـنج في تـثـــــنـيـــك
لولا اني أخشى تحسبيها عداوه
لافرح بحبسك عن عــيون تراعيك
أنا بـلا شـوفــك حـيــاتـي شـقاوه
والقى الفرح من كلمة بين أشافيك

[رحيل]

ألـذ من درب المحبه والغرام
وألـذ من شيٍ على الـدنـيـا تبيه

تلاوة المصحف وتكثير السلام
على النبي صلى الله وسلَّم عليه

[الجووهره]

اللهم صل وسلم على نبينا محمد

[الجووهره]

‏كلن على صبرهہ يلقى سعادهہ

‏ وكلن على نيتهہ' يلقى توافيقهہ!!

[عذب]

تخيلنا كذا دايم على صدق العطا باقين
على قمة سعادتنا تعيش اقلوب مرتاحه
بوحي

[الجووهره]

مهما تضم قلوب وتفارق قلوب
ان جتك خيره.. وان تعدتك خيره

لاتقتل احلامك على شي مكتوب
الغصن يبقى حي لو طار طيره

[عذب]

وش فيك ضايق عسى ماضقت من شعري
انا لياضقت اكتب لك من احساسي
ابيك تفهم وش الي مضيق صدري
وتصير واقف معي في وقتي القاسي

بوحي

[الجووهره]

لـه في عيوني دآآر عز ومھـابــه
وفي وسط قـلبـي للغلا كل تقدير
:
وله في الحنايا شي مـآينحكابــه
حتى أحـآسيسي معه دآيمٍ غير

[رحيل]

نكتم شعور قلوبنا من حيا الروح
دام الأماني بـالمحاني كثيره

[رحيل]

اغفر لنا ياغافر الذنب العظيم
واجعل لنا من كل ضيقً مخرجا

[عذب]

تعال واسكن غربتي ياغروري
وانقش على دنياي تمثال رسمك
ابيك رغبة تستلذه حضوري
وابيه ليلي يضوي بنور نجمك
خلك دروبي في متهات عمري
كانك تبي كل المشاوير يمك
ابيك تفهمني وتفهم شعوري
واجيك كلي واكتب القلب باسمك

من بوحي

[الجووهره]

قل للعيون اللي شكت بعد الأحباب
وقل للدموع اللي من الشوق هلت

وقل للشعور اللي من الهم منصاب
وقل للجروح اللي بالاحساس حلت

وقل للخفوق اللي عجز عنه الأطباب
ترى المشاعر من عنا البعد "ملت

[عذب]

المعذرة ماني على البعد مجبور
لكن غيابي لا بغيته بكيفي
وان غبت عن دنيا المشاريه معذور
بعض المعاتب فيه جرح وكليفي
واعيش دنيا البعد لاهي ومسرور
وعن زحمة العذال جوي نظيفي
في غربتي مبعد عن الظلم والجور
وحيد لكن غربتي ماتخيفي

عذب

[الجووهره]

لا تشـغل التفكير ويصـدع الرأس
آرســم مع التطنيش ، للعـفو باقه -

لـولا الحياء ومجامل الناس للناس
ما دام ود .. ولا استمرت عـــلاقة​

[عايض العتيبي]

الله يخس الحمامه ضيقت صدري
قم عطني الساكتون انكان ما راحت

خلوني ابا احسم الموضوع من بدري
والله ليمسي علاها الليل ما ناحت

[عايض العتيبي]

والله مانلام لو القدم زل =لو زلت النيه وزل القدميا
بين الرجاء والياس والخوف والذل=والسالفه يامتلف الروح عميا
معاد للصبر الكثير اتحمل=اليوم سلم يالغضي واستلميا

[سمو الحرف]

تموت جروحنا ماعلمت عن نزفها مخلوق
مقابرها الصدور ، وعزة النفس تدفنها !

[ملكة الرواسي]

يلج صوت المعاتــب داخل اعماقي
ماكنه إلا صخـب وانغــام ذويقه

[عذب]

يافراغ الحب بعدك فاصله
ياعلامات التعجب والعجب
يبقى الأستفهام هذا حاصله
ياجواب بين قوسين انحجب
قصة التاريخ ماهي واصله
يكتب محرم ويقراها رجب
بوحي

[خيال مطير]

{ أوعدك }كاإأن حضوري مسبب إزعاأج
........ أودعك ، وأغيب ، وألغي حضوؤري
لاصرت ماإني عند ضيقاإأتك ، فراج
.......... قوؤل ل مقادير الزمن ويش دوري ؟
ماني ب فاتح باب قلبي ل/ الإحرإاج
............ وماحب أكون إنساأن ماهو ضروري

[ريوف]

ياللي عطيتك خفوقي لا تساومني
ارجـوك لا تذبح الاحساس بيدينك

مـقدرت اقاوم غرامك لو تقاومني
نـبـض الـمشاعر تـزايد بـيني بـينك
؛
ريوف

[عايض العتيبي]

لعل من يسعى للاحباب بفراق =تلوعه الدنيا على كل غالي
عسى وليده كل ما صار ملحاق = تومي علاه مروحات الليالي

[عايض العتيبي]

شدوا عربنا وقفوا عن عرب عتقا=تنحروا من شمال الخط الانكيري
لاوالله اللي حطوا دونهم متقا=والرجل مافيها صبر عن المساييري
قلبي علاها تحرق وانفتق فتقا=تفتيق شلف الحروب لبيت الاميري

[سمو الحرف]

ثقافة الناس لو انها على الفطرة
وزارة التربية صكت مدارسها

ضاقت ملابس عباد الله من البطرة
وصدورها صارت اضيق من ملابسها

والا انت ياللي عليك القلب منشطره
غلاك ورده في روض القلب غارسها

توجعني اذني ولا تنفعني القطرة
ما ينفع إلا صدى صوتك لا لامسها

[ملكة الرواسي]

محظوظ من يهوى له انسان يهواه..
ومحظوظ من خله يراعي شعوره..

[سمو الحرف]

اسرفت فيك بكل شعر ومشاعر
واهديتني جرحك مغلف بحرمان .

ماهي حكايه حرف او قول شاعر
حبك قدر لو هو معاناة و أحزان

[خيال مطير]

http://www11.0zz0.com/2011/12/29/10/866962698.jpg

[رحيل]

أصبر على الدنيا ونكبات الأيام
وأتبع طريق الحق جره بجرة
عن واقعك لاياخذك طيش الأحلام
وأعرف تـرى حاجتك للناس مرة

[أستاذ الحب]

احبك كثر ما اغليك واغليك قبل اهواك
غرامك بصدري مثل الانفاس لابده

تراود خيالي صورتك لانويت انساك
تجيني على ما قيل هجمات مرتده

[خيال مطير]

أإًٍُن كـآ‘إًُن. قـلبـك مآ‘إسـكن فـيه مخـلوٍق ..
هذآ‘إ رقـم،ـئء. قـدآم عيـنك ودٍقـ
وأإن كآن قـبلك دآرس الحـب والِشـوق
رقمـن خذيـته. يـآريـش أإلع،ـيـن ][ ردٍهـ ]

[عذب]

ياغيمة الحب غطينا باكتانك
ضمي مشاعر قلوب الحب ياغيمة
اسقي عروق الضمى من فيض هتانك
زيحي غبار الجفا تكفين ياديمة
لاجل الغلا ضمي الروحين باحضانك
حبايب بعاد00 ماللحب من قيمة

بوحي

[رحيل]

ي النوم لك حطيت مفرش ولاجيت
و اتعبت راسي بـ ارتفاع الوسايد

وش مزعلك مني عن العين صديت
و انا السهر ماهو لعيني عوايد

[سمو الحرف]

لا صار قلبك ماقدر يحتويني ،
حرام .. احبك واتبعك واتمناك

يكفيني من الصدق رعشة يديني ،
ويكفيني من الحب طيفك وذكراك

اوعدني تنساني بزيني وشيني ،
وانا اوعدك لو مانسيت اتناساك ! .

[عذب]

ياغاليه خفي على الhttp://www.rem2b.net/vb/images/smilies/fca99756.gif تكفين
لاتحرمين العين شوفة عيونك
متلهف ومشتاق لوكان تدرين
والله ماتسوى حياتي بدونك
مشتاق للأحضان والعين بالعين
يازينها بالحب لحـظة جنـونك

بوحي

[محمد العواد]

دام قلبـي يالغـلا مـدمـن عليـك ؟!!

لا تـجــازيـن المـحـبّــه بـالـغـيـاب..


نديم القوافي

[سامي الغنامي]

‏لاتجبر الناس بـ الدنيا على قربك
يبقى لـ عمرك ثمن مهما تساهلته

[سمو الحرف]

أنا أكثر أنسان أنخلق من طين
ما بدلت نفسى ... طبايعها ..!

أجمل علاقات الزمان .. الشين
اللي .. تروح ما نودعها ..!

[عذب]

يحل بناالمسا من يوم شمس المغيب تميل
وتبدا رحلة الليل الطويله من المغرب
وتبدا للألم قصة يرددها ظلام الليل
سواليف من الضيقة ومالي عنها مهرب
احد هاليل يجلب له هواجيس الغثا والويل
واحد خالي من همومه بليله يسهرويطرب

بوحي

[عازف الشوق]

لو ضاق من غيرتي مايقدر يغادر
اضيع الدرب ب اجوابته وب اسالته
انا ادري اني ملكت شعوره النادر.
وهو يدري اني احبه لو ماقلته...

[عذب]

مسـاالجـمعة يساورني شعـوربالدعامقبــول
عسى الله ينصرعباده ويحفظ امة الأسلام
عسى يارب تشملنا بعـفوك ولرضاك نـول
وتجعل خاتمتنا خير وحنا سجد وصيام


بوحي

[محمد الغنامي]

عذب صح لسانك
اللهم امين

[صـدووودٓ]

‏كنت بـ هدوء آعيش و آقوم و آنام
‏م اذكر لمحت بـ يوم ذبلت زهوري .!
‏/
‏جيت و سرقت القلب / فتّحت الآلام
‏و ليتك قبل لا تروح : فاهم شعوري !

[سمو الحرف]

كل ما مرت ملامحك بـ خيالي ؟
اتخيل ضحكتك واضحك معاها ..

[عذب]

محمد الغنامي صح بدنك وتسلم على الإشادة تحياتي لشخص الكريم صدود شكرا على الأعجاب والتواجد تحياتي لك

[عذب]

http://www.hiamag.com/sites/default/files/2012/09/Cherries.jpg

مثل الكرز بالروح قلبي وقلبك
العرق واحد والصدر فيه قلبين
عرق الغلا ماليه حبي وحبك
ويصب كل الحب فقلوب الاثنين

بوحي

[رحيل]

لولا ظروف الوقت م قيل لا باس
ولولا الامل م يبتسم فالزمن حي


الله خلق هـ الناس تحتاج للناس
لا تبخل إليا صرت تقدر على شي

[سمو الحرف]

رضينا بالنصيب ونقتنع بالحظ والمقسوم
ما حققنا طموح ولا حلمنا أحلام ورديه

نعيش الواقع بكامل تفاصيله شقى وهموم
نمارس كل حريه وحنا بدون حريه

[عذب]

ماصدني عنك غيراشغال هالدنيا
ياسيد البيض ماني ناوي الصده
والا مكانك بوسط الخافق هنيا
شف داخل الروح شوق واصل حده
لاتكثر اللوم قلبي ميت بليا
يكفي على القلب يشكي البعد من مده

بوحي

[عازف الشوق]

متشابهين بجرح واشياء عتيقه
ضجه حنين وليل واحلام غرقااا
وحزن قتيل وكل آآآه عميقه
وقلوب تنزف حب ل قلوووب حمقااا..

[صـدووودٓ]

‏'
‏
دام الصباح في حضوري شي ثاني
‏أنا حضرت و اسعد. الله صباحكم
‏
‏⁧‫.

[غزلان]

جرحين منكم واحد جديد وواحد قديم ~
والجروح الدآميه من زمآني كثير!!

اثنين في حيآتي كانوا الصديق والنديم ~
والدروب الحآيره تاليها حزن ن مرير !!

سنين طآفت من ظلمكم والله عليم ~
والطعون الرآميه رمت بي للمصير !!

بقلمي ~

[نور]

‏الى ربحت رضاك يارب عني
‏ماهمني بدار الفنا ماخسرته
‏ودي اسامح كل من هو خذلني
‏مادامني عـلى الوفا ماجبرته
‏~~حمد البريدي~~

[سمو الحرف]

كل حرف لك كتبت وكل حرف لي قريت
فيه شي من عناي وفيه شي من غلاك

في غيابـك يا حبيبي يا كثر ماقلت ليت
وياكثر ماقيل عني في غيابك وش بلاك

[عذب]

يازاير الليل لاتاقف على نومي
لاصرت حلم تبخركل ما افيقه
نشدت شيخ القناة يفسرحلومي
يقول حلمك خيال وصعب تحقيقه
بوحي

[الجووهره]

^^ روووعه

صح لسآنك عذب

[الجووهره]

تمرني ذكرى ليالي قديمه
في محتواها سالفة عمر واحلام
شوق وصفا قلب ونوايا سليمة
ما اقول غير الله على ذيك الايام

[عذب]

صح بدنك الجوهرة ومشكورة على اعجابك


لاتتركـي قــصة هـوانـا في غيـابك تنتـحر
سوالـف الغيـاب للـقـلب المـولـع موجـعه
في وقت تنوين الرحيل تراحياتي في خطر
قـلب يبـي قـربك تـراه يموت يـوم تـودعه

http://smiles.al-wed.com/smiles/42/i124086747_58528_4.gif

بوحي

[رحيل]

افعل الجميل وعامل الناس بأحسان ٓ
ترا الاعمار تورح والطيب يبقى

[سامي الغنامي]

‏.

.

فـ العشق خذ كلمتين وردّها عنّـي
بُعدي عنه مثل بُعد طريف عن لبخه

انا اعرف السالفه بس الوكاد انّـي
صدّيت والناس ماتدري وش الطبخه

[خيال مطير]

ياسامي الوقت ماهو وقتنا الاول
الناس قامت تغير في مباديها
أشوف ناسٍ بغمضة عين تتحول
شوفي بعيني وقول الناس وش فيها

[سامي الغنامي]

ياسامي الوقت ماهو وقتنا الاول
الناس قامت تغير في مباديها
أشوف ناسٍ بغمضة عين تتحول
شوفي بعيني وقول الناس وش فيها


خيّال من ضيقته بالصوت لا موّل
مواله ابداع فأولها .. وتاليها

الناس ف اتلى الزمن بعقولها حوّل
مرض يسمى النفاق الله يشافيها