وش حيلة اللي تالي الوقت بلشان = اللي يضيق به الفضا وش سواته؟
يشوش راسه كل ماشاف ميدان = وقلبه يعبّي كامل امعسكراته
لكن حظه مانفع فيه برهان = من وين ما طقه تفرّش صفاته
عاطل وعزابي من الجوع هلكان = ياوجد حالي وجد من هي حياته
ليتي وزير وراتبي عند سلمان = واذا غديت بشيء ماقال هاته
اعيش مستغني عن افلان وافلان = تاجر وعندي مالٍ ادفع زكاته
و إن كان ربي كاتب اعيش طفران = امّا غناة الذيب ولاّ مماته
اللي حداه المرّ يرضى بمرّان = ومن لاشبع بالخبز يرضى فتاته
ابا اشتغل سواق في باص مليان = وسط الرياض وزحمته واقتراته
مع صبح ربي شايلٍ جول غزلان = لو ماحصل لي غير نوع التفاته
ولو مالمحت الا مصاخيف ذرعان = لامرّني ظبيٍ يمسّس عباته
وان يسّر الله مثل فتوى العبيكان؟ = أعثيت فالمفلى وعنزه وشاته!
انسى زمانن فيه نيدو ودكان = وما عاد ابا الجبن وثلاث ابقراته
والله غفور ويلطف بحال الانسان = كريم يمحى سيته بحسناته
الوذ به واعوذ من كل شيطان = و أهم ماعند البنادم صلاته