ياوجودي لا تعدى الليل عن وجه النهار = وجد من صكت سنينه من الفرقا عليه
وياوجودي وجد حرٍ كفخ من عقب طار = وجد من خانه زمانه ولا احدن قال ليه
وياوجودي من غدت دنياه عايش في إطار = مايجي إلا معاه ولا يروح إلا إليه
وياوجودي من توفى والسبب سوء اعتبار =ما اعتبر بالحب الأقشر ولاّ اللي بيجيه
ولاّ انا ياصاحبي رحلتي وضع إنتظار = من بعد ماراح عني وانا ناوي اشتريه
استحيت اقول تكفى وتكفى للكبار = ماتقول إلا على شرواك يالقرم النزيه
ولاّ أنا من خلق وجهي ليوم الإحتضار = والله إني ما اداني خوة الوجه السفيه
لكن إن الوقت قاسي ولا فيه إختيار = وإن بغيته ماحصلّي لو بغيته كل أبيه
وإنت ياللي صار قلبي معك كنه مطار = إن حصل لك مابغيته وإن بغيته قلت أبيه
الغلا ماهوب حيا الله محطة للقطار = وإن تعدّاه القطار يروح محدن لدّ فيه
الغلا مثل المطر لا سقا الجدب القفار = لين تشعب من مزونه وتحيا من يديه
والغلا ماهوب كلمه ولا إسمٍ مستعار = الغلا إحساس يحويني لو إني ما احتويه
الوفاء والمكارم والقبائل والوقار = منعتني قبل اسوي فيك شئٍ ما ابتغيه
من ولد في معزه مايحب الإحتقار = ومن مشى رمضاء التغلي لزومِ تشتويه
ومن تعود في حياته يعيش الإنكسار= اسألوه لويش حي ؟ دام موته يحتريه
الليالي تنفني والصغار هم الصغار = يعشقون الذل والكذبه ونطلات الوجيه
ومن يعاير للهدف ثم يخطي في العيار = يتحمل هالخطأ ويتحمل مايليه
وأنت يوم أخطيت في حقي وتسأل ويش صار = سامح الله ظلمك اللي لا انتهيته تبتديه
وحسبي الله يوم دمعي تولّع ثم فار = فورة اللي سالبينه اصغر حقوقه ذويه
وش لك بكثر الحكي بختصر لك إختصار = بحكي اللي في ضميري ولوّك ما تبيه
لا تعوّد طالبك مابقى عندي خيار = تاب قلبي عن غرامك ولا تسألني ليه ؟