التجربه عنـدي لهـا مقيـاس=اخذ وعطاء بالواقع الملمـوس
عاملة ناس من جميع اجنـاس=واخذت من جور الزمان دروس
لقيت فيهم طيب مع نوماس=ولقيت من خلف الوجيه نجوس
نهمت همه ثم رفعـت الـراس=لقيت من حولي ضعاف نفوس
المـال سيـد قدركـل النـاس=حتى المراجل تشترى بفلـوس
شربت من اثم الظنون الكـاس=وكسرت بعيون اليقين الكـوس
اشغلت ذهني صابني وسـواس=صحيت غفوه وابتلتني هجوس
وقفت مابين الرجـاء واليـاس=اندب بشعري حضي المنحوس
وقع القلم في صفحة الكراس= حده بنفسي مثل حد الموس
فصلت جلباب الظروف لبـاس=و لبسن بنات الفكر بالملبـوس
لباس الزمان اللي شديد البـاس=ماهيب نفانيف الفرح بعـروس
هذاك يوم ان شمعت الجلاس = تضوي علينا والكرام جلوس
ببيت الشعر ملفى عريب الساس = وريح الكرم في بنه المحموس
مع العود الازرق هب كا النسناس = بكل القيم رفعة شموخ الروس
يوم المعادن من ذهب والماس = من قبل مايصير العلم منكوس
واليوم حنا وضعنا محتاس = حتى مجالسنا نخرها السوس