البارحه الهاجوس خيلٍ وغايره = وشلون أركدها والاعصاب ثايره
أكتب لأبن ساعد ويقرأ جدايدي= عساه يظهر مابقى في ذخايره
يمكن يحل المشكله لادرابها = ويسعف خفوقي يوم بيح سرايره
أسند عليه من المواجع قصيدتي = قصيدةٍ جتني مع الهم زايره
أجر صوتي وأظهر اللي بخاطري = وأنقى معانيها ليا جات طايره
ياخوك أنا همي يحشش علايقي= وأزريت أهدي خافقي يوم أسايره
هموم صدري تحرم العين نومها= جني سوا وخيوله امتغايره
بسباب ريم وقتنا أخلف طبوعها = خلت تفاكيري من الهجر حايره
أرسل مراسيلي وتترك رسايلي= وخلت خفوقي يحرقنه سعايره
مطرد ورا المقفي ولاهي طبوعنا= لكن على ماقيل الايام دايره
لاسلهمت بالعين ضعت بسوادها= أمشي ورجلي وجهة أخطاه سايره
عين الوحش في حين لحظة هدادها= وتشوف صيدتها مع الحزم نايره
شيهانة ياخوك مابه مثيلها = عنق الفريد اللي بلا أسباب ذايره
أقفت وأنا ياخوك مالي بغيرها= ومن عقبها قلبي تزايد خسايره
من عقبها ياخوك كثر ن مواجعي = وأصبر وقلبي من يناحي عزايره
وأشوف لي مزنن تكاشف بروقها = وأصبر وأنا أدري بن الايام جايره
نشوف بارقها ونسمع رعودها = والمزن باقي والمطر مع بشايره


===== رد الشاعر مذكر الروقي=====


يامرحبا بالخط جني قصايره = قريت مكتوبه وشفنا قرايره
جتني مراسيلك وفزيت مرحبا =باللي من اغلا الذود ياخذ حرايره
الحزن والهوجاس والهم ينجلي = ومن يعتنز بالله ينور بصايره
واليا أعتزيت بواحد له فعايله = يشيل من درب المعنى عثايره
أما يشيل الحمل والا يعدله = وألا يجبر من تخالف جبايره
وأن كان تشكي من حبيب معذبك = فالحب ذا فعله وهذي جرايره
يذوقك طعم حلو في بدايته = ولابد من يوم تذوّق مرايره
لكن لاتاخذ على خاطر الجفا = وسع على صدرك وفكك زرايره
أن كانه يحبك ويرجي محبتك = يجيك وعيونه من الدمع فايره
وأن كان ماتملك سبوقه وماكره = فطيور مشبوكه وهذيك طايره
وأنا بعلم كل من يجهل الهوا = وألا أنت تعرف كل نبت وبذايره
الحب ماودك تعلم به البشر = سكر عليه القلب وأغلق ستايره
مير أحتزم بالصبر والله يعينكم = وأصبر وقلبك عن طواريه خايره