لا يعكر صفوك

08-02-2026, 07:54 PM

ارحـبي يا لـهــفــة الـقـلــــب وحنينه
عــد مـا تـمـسـي عـيـوني لك شفوقه

اسفرت يا فـرحــة الـــروح الـحـزينه
وانورت يا أجمل مــن البدر وشروقه

يوم شفتك صاحت اهمومي الدفينه
جات من تاطى على الحزن وتسوقه

الــهــنــوف الـــحــــره الــــدر الثمينه
والـغـزال الـجـامــح الـتـرف السبوقه

واستفاق الــحـــزن والدمعه فـ عينه
بعد شاف أن فـرحــة أوصالك تفوقه

أبـتـسـم حظي وحـظ الــحــزن وينه
في وصـالك غـاب يالـتـرف الخـلوقه

اقلطي عــرشــك بـصـدري تحصلينه
مـن ورا عــوج الـضـلــوع ولن يبوقه

مـن رسـم سـكـة غــلا بـيـنـي وبينه
انثنى من خــيبـتــه يـشـكي حروقه

اشهد أن لصدر في أوصــالك سكينه
تبري الخـفـاق مــــن حــزنــه وعوقه

لــنــك اللي بـالـمـحـبــه تـسـكـنـيـنه
والك الـيـن الـمـوت لن يبدي عقوقه

اسـتـريـحــي يا مـنـا القلب وضنينه
والله أنــك نــبـض قـلـبي ومعشوقه

قلبي اللي وســـط صـــدري تملكينه
كــل بـيـبـانـه عـن الــغــيــر امغلوقه

يا شـبيـهـة يـوسـف بـطـيـبـه وزينه
مـن حلاك وزيـنـك الــغـيـد امخنوقه

عـايـشيـن بـضيـق واهـمــوم وغبينه
في عـــذابـاً ما هقـيت احدن يطوقه

وثـار ضـدك حـلــف يـمـكـن تجهلينه
اجـتـمـع فـيـه الامـيــنــه والـسـروقه

مثل حلف أخـوان يـوســف صانعينه
بـس بـتـنـفـيـذه ما تـتجـرا امخلوقه

قـعـر جــب الـبــيـــر والله مـا تجينه
دام فــيـني دم يــجــري في عـروقه

انـطـح الـعـالـم لـجـل عـينـك واهينه
والــكــرا الـــعـــذال والله مـا تــذوقه

ابـشـري يـا فــرحــــة الـعـمـر وسنينه
بالسـعـد والـخــيـر والـشـعـر وطروقه

واطـنخـي يا شــبـه مــكـــه والمدينه
بالـسمــؤ والــجــاه غــيــرك ما يلوقه

دونــك اللي شـال عــمــهــوج ابيدينه
وخـلـفـه الـعـتــبــان مـن بـرقـا وروقه

مـثـل ظـلك مـعـك دايـم تــاجــديـنـه
طــيــرك اللي كــل مـا تـخـلي سبوقه

ما يــلــد بــوجـــه غـــيــرك وأن تبينه
يـحـلـف أن أوصـال غـيـرك مـا يروقه

اقــســم بـــربــي وقـــرأنــــه وديــنــه
والـوفــا والــحــب واحـسـاسـه وذوقه

أن قـلـبـي بـالــمــحــبـــه تـمــلــكـيـنه
حـاكـمـه وحدك على الـقـلـب وخفوقه

مــيـــر ياعــبـق الــزهــور ويـاسـمـينه
والـقـــمــر والـرعـد والــغــيــم وبروقه

لا يــعــكــر صــفـــوك اللي تـسـمـعـينه
دامـهـم تـحـت الــثــرا وانـتـيــن فوقه

يـكـفـي الله مـــيـــزك عـــن عـالـمـيـنه
وفـوق زيـنـك وافــيــه ذربـه صــدوقه

من خـلـقــتي والنـسـاء بـ الـزيـن عينه
كـنـهـم جــذع الــنـخــل وانتي عذوقه

جـل وجـه اللي بــرســمــك تـحـمـدينه
الـذهـب مـن بـعـد زيـنـك طــاح سوقه

والـرمـل يــعـشــب لــو أنــك تـدعسينه
والــمــزن جــــرتـــك للـمـاطـــر تـتـوقه

والخــتــم يـا أم الــجــمــال وجـنـتيـنه
الـمـدايـح مثلك مـــــن ابـسـط حقوقه

ومن جــحــــد زيـنـك بــزيـنـك تقهرينه
كــل مـــا نــــورك جــلا اللـيـل وغسوقه

الشاعر بشير العتيبي