والله مالي يا ابن الاجواد غايه=في طلع غيدٍ ينتجن الثمريا
اللي شعا فكري وجدد عنايه=خزايزٍ عوصٍ وفيهن ندريا
بألذاكره منحوت ماضي صبايه=نحت الرسوم الدارسه بالصخريا
يسرح بها فكري ويبعد نيايه=اليا ذكرت ايامنا والسمريا
شواردٍ ما جبت فيها دعايه=مكسيةٍ ديباج ماهيب عريا
يفرح بها اللي مابجيد الرمايه=اللي زنوده من عنى الوقت زريا
قرمٍ خصيمه بارعٍ بالروايه=اليا وقفت بجانبه من دحريا
يفهم معانيها بليا قرايه=اللي يعرف شيوخها والجبريا
ما قلتها من شان جمع الجبايه=الذيب ما ياكل من الضان هريا
الخصم لاحاول يقرب نحايه=حطيت له حنضل وملح وغجريا
حتى يضيع حجته والوشايه=ويسري سوات الذيب وسط الخشريا
ومن الرياض يشوف سكان سايه=ونجم الثريا في عيونه قمريا