الطرق هيظني وانا قبل مهتاظ=وسريت مع طاروقها واقلعتني
وفعل المضارع جاوبه هالكٍ ماض=والمرمسه من بينهم روعتني
منها خفوقي يوم به لجلجت جاظ=وصبرت لكن جظته مؤلمتني
وعن ما دهتني فيه حاولت الاعراض=وعزيمتي خارت ولا ساعفتني
ليت الزمن يا بادع القاف مرتاض=(والا السنين بغيبها علمتني)
ماكنت الوف القلب في لاهبٍ لاض=واذله إلها لين كلٍ شمتني
بسحر العيون اللي نواعيس وامراض= استدرجتني بالهدب واسحرتني
لطعم طاريها اتلمظ تلماظ=وارقص فرح بطيوفها لالفتني
واخذت في خيلي مع الدرب مركاظ=وارخيت اعنتها لها واطرحتني
وناديتها وانا من الوجد مغتاظ=ولها رفعت الصوت لين اسمعتني
(تراي من دمعه بعد فارقك فاض)=وتبسمت لي بالبرد واسفهتني
يامن بنيت الشطر الاول على(آض)=حاولت اماشي قافها واعجبتني
واشكرك اتحت بقافك العذب فضفاض=لآااهات قلبٍ كنها واجرحتني