جتني القوافي مثل عوص الكبار الظهور=لا درهمت بالطرب بالصوت ولا النشيد
ثم ربعت بين عوجان الضلوع وتدور=من عقب ما لاح برقه صار غيثه شديد
خلا هواجيس فكري تستعد العبور=في رحلتن بين واقع والخيال البعيد
ومسكت خط المشاعر وارتجال الشعور=من هيض موقف شعور النفس تبغى تفيد
من قال اني بعيد من الشعر والظهور=خلف الكواليس باقي مستمع للقصيد
اقول له مرحبا والرد بين السطور=ان كان تبغى جواب مني وتستفيد
انا مع الشعر شاعر كل موقف ودور=احيان شاعر حزين احيان شاعر سعيد
شاعر ولي فكرتي واحساس صعب يبور=ومع هواجيس فكري كل يوماً جديد
لا تقول بعد الظهور ان كان تبغى تشور=واثق بشعري ولا ادور عليها شهيد
اعز نفسي بصمتاً مع طوال الشبور=واليا طلبوني قصيدة جبت دراً فريد
واللي يدور بنفسه سمعتن بالحضور=احيان تصدف معه واحيان يصبح زهيد