يانجمة الصبح كبدي منك مرهوقه = لاشع نورك علينا لاتغيبيني
ستاير القلب من فرقاك مفتوقه = اصبر من العام لين انك ذبحتيني
الود لو نتركه عنا وطاروقه = أظني ارتاح وانتي تستريحيني
لبيك ياللي تجر القلب بعروقه = كله على شان يوم انك تلبيني
تلحني لح ركب عجلوا سوقه = او جل ذود مسريهن شيابيني
عديت عن مبسم المجمول لاذوقه = انا بلاي الحيا وادرا على ديني
وا قلب ياللي من الجازي دنا عوقه =ياناس شيروا عليها لاتقاصيني
وان كان قلبي تلبش عنه صندوقه = شدوه لين آتجود فيه بيديني
قالوا معاليق قلبك منه مسروقه = قلنا خذته الضحى والناس واعيني
ياليت ربي ومر (خالد) على شوقه = يفك حبله ولو يعطي ملاييني
الأوله ليت ابو خلي من الروقه = والثانيه ليت ابوي من القحاطيني
يالله ياخالق الدنيا لمخلوقه = تقدر على الموت تذبحني وتحييني
تلم شملي لابد الروح مرفوقه = باربع هناديس في قبري تخاويني