وين انت ياللي ما تمنيت غيرك=الا المنام اللي عقب غيبتك غاب
وين انت يدفعني ضماي لغديرك=عندي على غيابك مشاريه وعتاب
ليتك تشوف اليوم حالة عشيرك=اللي معك يتعب على بذل الاسباب
متى مصيري يرتبط في مصيرك = متى تلمّ اقدارنا شمل الاحباب
تجيب نسمات المحبّه عبيرك=بالليل يا هبت من ديار الاجناب
انا سجينك يا حبيبي واسيرك=سجني مؤبد والرجا بطلعتي خاب
وفي كل حالاتك بشرّك وخيرك=اهدي لك حروف المحبه والاعجاب

الشعر من غزْل المشاعر يخيطه=من كان في تفصيل الابيات خياط
ما يقطع بحور القصيد و محيطه=كود الذي في قوة ابيوته افراط
شعرٍ شروكه بالمعاني غويطه=ما مات لو عصره قبل عصر الانباط
من ضاق و ضغوط المشاعر تحيطه=يرتاح يا عدا كبر طلعة الغاط
في مرقبٍ يبعد شقاه و يميطه=يشتاق له من شاف بأيامه احباط
سجتك مع جرد السهال البسيطه=اخير من جلستْك بازعاج و غلاط
نزّه جنابك عن جناب السقيطه=واتعب على اللي بخوته دوم تحتاط
يا احتجت يصفط لك بروحه صفيطه=مسطور طيب وبالمواجيب يشتاط
دنياك مع سمح السجايا عبيطه=ما هاط شي من اخبث الناس ينهاط
بصدوفها يا عونة الله سليطه=توجع وهي ما تضرب الخلق بأسواط
منها فطين القلب يحتاط حيطه=من يدرك ان ايام دنياه شعواط
بين الشتاء و الصيف تطوي شريطه=تفرنا و تبدّل اشواط باشواط
و اليوم ما معنا نفوسٍ نشيطه=لا بدّ للقرناس من ربط و رباط
ما عاد باقي غير طيّ الخريطه=اليوم عقب ايام نيسان و شباط
يما طلوع سهيل يعتق ربيطه=ونصبح بعد راحه مشافيق ونشاط

ياوجدي لبعض حلوق من كثرة الترحيب=منبحه حلاو الفقس ماعاد ينفعها
وانا انصح لمن ذي حالته من حسين ايجيب=لبان وربع مره جديده وينقعها
ليا صار النظر ماله بما يعترض نصيب=عينك غضها عن ملعب الغيد وامنعها
وانا يا نزيل السجن متخصص وطبيب=لكن صابني شيٍ ما اعرفه من اتلعها
زولٍ يامحمد شفته بمنظرٍ عجيب=سباع الرجال بغمزة العين يسبعها
تورطت مع هالشخص في موقفٍ رهيب=نفت عرفها لي بس بالقلب طابعها
وانا خابرٍ للقلب تخمين ما يخيب=تكلم بهمس ازريت بالسوق لا اسمعها
وعلى رغم كثر الناس حاولت اجي قريب=واكبداه يوم اني فطنت لمدامعها
خافت من عيون اصحابها فيِّ تستريب=وقفَّت ومعها اقفت عيوني اتابعها
وعودت الاع الورق ماجابت إله اجيب=واكفكف بعيني دمعة الوجد واردعها
خايف ينتبه لي شامتٍ مرتدي نصيب=علومٍ مضت لي يمكن انه مسنعها