تعودنا على الضحكة ولو وسط الحشا وهاج = ابي من شافني يضحك وضحكة سنه تباني
و أنا جفني سهير وصمتي المبهم ضجيج ازعاج =من اسباب الهجوس اللي بصدري دوم تقصاني
شكيت ولا بكيت وكل كلمه محكمة بسياج = على عوج الضلوع اللي من الهوجاس تنخاني
سهر عيني بناء له في جفوني والضلوع ابراج = سبب منهو تمكن بي غلاه وصار سلطاني
ليا جاء الليل طيفه زارني كنه ضياء وسراج = واسولف له ويعطيني من الاخبار ما اكفاني
سوالف عن مفاهيم الشعور و رمز ريبورتاج=بليّا سين جيم الكل منا جاوب الثاني
الا يكفيك يا طيف الوليف , ليا لبست التاج = مرصّع بالدرر ما سوّقوه بكل الأوطاني
و لا حطيت من دونك لصدري ضبّه و مزلاج = اورّدك لعدود الصدر يوم تصير ضمياني
و في الواقع بعيد ولا حصل لي يمهم منهاج = قرار الوصل يامر به هوى بالي وينهاني
حفظته سر غامض والسراير مالهن مخراج = يا كود بقاف شعري كل ماغنيت الالحاني
لو الدكتور ينفع يا معاند, هاجسي ما داج = ولا من قال انا شاعر عطيته درب عنواني
عناوين الهجوس بخاطري تنزف كما الهداج =و انا اضحك كن قلبي خالي(ن) من حب خلاني
و يمين الله لتبقى اوراق ودّه طي في الادراج = مثل طي الصكوك اللي تقاس بغالي الاثماني
و على عزف القوافي لا استمِر ويكثر الانتاج = و تبقى اسرار قلبي مااتلفظ نطق بلساني
ولا تجذب مثل سلك الحرير , ونعمها ديباج = و اميّز من ملكني بالغرام بتاج ديواني

ياليل ياليل ياليل السهر كدموس ناداك = يقول عد النجوم الساريه يا ليل توّك
و ياهاجس الفكر يوم الطيف جاء يمك وناجاك = في مهرجانات عزف القافيه قم شب ضوّك
للابجديه محيط المفرده ف الشعر ينخاك = لا تسدل ستار صمت بظرف عابر يا سموّك

نبعة جبل تروي كبودً عطاشا = ودمعة رجل ملحٌ أجاجٌ ليا ذقت
لا تعجب لدمعات عين ٌ تلاشا= ما صغتها ب/حرفي ولا ارضى لها المقت
اصونها عزّه ولا به مخاشا = ولا اصخي بها الا لمن لها كفو في وقت
الفقد للمفقود مابه غشاشا = ولا كل من يفقد له بدمعي أغرقت
وجرد الفيافي للمواطي ءهِشاشا = وصمد الفيافي كل قشعه بها احرقت
و لبست منها الليل كنه قماشا = و نوّختها فجراً , ليا منك اشرقت
و إن شفت نجمي في سماك ايتواشا= غرد على صوت الرعد لا تضايقت
خل الورود تفز له بإنتعاشا = و خل البروق تصاحبه كل ما اشتقت
يسقي الجبل ودّان و الا رشاشا = شلال من صافيه لك ما تعمقت
ما ابخل بهجسي يوم بالقاف جاشا = كنه خيول المعركه حين سابقت
والهجس عن كلمة غلاك ايتحاشا= و صرت احذف الكلمة لها ما تطرّقت
والا بفصح لسان مانيب باشا =تعبير ما كنيت ما قد توهقت
غلاك ناب الداب للجرح ناشا = غيّب بتفكيري وانا منه ما فقت
وما عاد معك احب طول النقاشا =من نوشته مع كل موجه تصلفقت
خذ ماتبي مما بنيته بلاشا = وما ادري لو انك للقدر ما تلاحقت