تعارك جيوش الشوق في داخلي من عام=توارد عليّه والتفاكير جيّاشه
تداحم بصدري قوم وطعونها بسهام=تطّش العمايم فوق والروس شوّاشه
ليا اظلم سماها ركّزت ف الضمير خيام=توّرد سهومٍ للمعاليق نهّاشه
لو أتشوف طعنات السهم قلت ماينلام=سبايب جيوش الشوق والعين جهّاشه
على الهون في صدرٍ نما ف الزمن منظام=تحدّه ظروفه والتباريح غشّاشه !
عليه الدقيقه يوم ويعيشها ب ايام=يكافح جروحه والهواجيس معتاشه !
واذا جاء يبي يسلى وينسى التعب وينام=تذكّر سيوف النوم في ثنوة فراشه
تمر الليالي والمياسم عليه حيام=ولا فيهم اللي كف شرّه ولاناشه
على الله ياجروحي مدام الوعد قدام=مدام النوايا بيض للطيب حواشه
ولا عاد عندي قول والمسك خير ختام=تتم المعاني والتفاكير جيّاشه !