طاب القصيد وقلت والصوت مبحوح=يانار في العوج المحاديب شبي
قل ماتبي ياهاجسي وابعد الشوح=وعطني وجه من شان القيك لبي
دام العطاوي له مراويح وسروح=وبملعب الخفرات ماله يدبي
فانا بمزحي جد وبجدي امزوح=وما بينهن غرقت في حب كبي
يروح واجي له وياتين واروح=ولعب بذيك وذيك فاره بعبي
ولو بالطلاسم غيري يشبه البوح=انا وهو له فهمنا مستتبي

ياذا الخفير اللي مرابط على طول=ياقو صبرك لو رجولك حديدي
زولك دبل كبدي كما زول ابا الهول=ابقيظ والا وقت بردٍ جليدي
بغير ربي لاش قوه ولا حول=والحمد له ونريد منه المزيدي
اسمع وانا ماودي علومك اتطول=لكن مني دوك علمٍ وكيدي
فك اسر نجلاء رغم رغبتك يالزول=وخذ جيبك وحبلك وهات الجليدي
الشاعر اللي منطقه غير مملول=يجلى عن الكبد العيوف الصديدي
لمنطقه معنى ومغزى ومدلول=تسمع وتطرب وان سكت تستزيدي

الليل طرف والكرى عانق الموق=والبعد كبدي يالهواوي حرقها
القلب من حب اريش العين مفتوق=بنت بدويٍ تذبح اللي عشقها
عيونها النعاس والرمش من فوق=لاسلهمت سبحان ربٍ خلقها
هزت عروش القلب من كل معلوق=واستاقته سوق الجمل ثم سبقها
اسمع مثال ان كل مطرود ملحوق=لاكن هذي مابه اللي لحقها
عاهدتها وانا على العهد مابوق=وهي على الميثاق لاخر رمقها