يا (المقطّم) لك ثلاث اهضـاب واخبـارك قديمـه=قلعة (الفسطاس) و(ابن العاص) واجيوش الصحابه
جاك (عمرو) من بلاد الحـقّ بجيـوشٍ عظيمـه=واستتـب الامـر بالسيـف الرهيـف ولا غرابـه
امـة التوحيـد تدعـي لـلـدروب المستقيـمـه=بالسماحـه والحديـث ومحكـم الله فـي كتابـه
مير يا ضلـع المقطـم صـارت الامـه سقيمـه=مابقـى في عالم الاسلام قَدر ولامهـابـه
ما طلـع فينـا فحـول وباتـت إنسانـا عقيمـه=ماذخرنـا قايـدٍ يشعـب علـى الاعـداء ركابـه
كل واحد مـن عربنـا ضايـعٍ لـه مـع خريمـه=ليـن خلّونـا ضحـيّـه للحصـانـي والذيـابـه
يالمقطّم .. قل لضلع (طويق) يصحى مـن نعيمـه=وقل لضلع (الشيخ) وش سوّا (النصيري) بالغلابه
وقل لضلع (اطلس) ترى الاوضاع ماعادت سليمـه=وقل لضلع (اشعيـب) لاترفـع متونـك للسحابـه
وقل لضلعان (الحجـاز) ان المصيبـه مستديمـه=امـة الاسـلام فاخـت سيفهـا قبضـة نصابـه
يالمقطّـم لا تلـوم القلـب مـن شـيءٍ يظيمـه=ضاقت اصدور الحرَار .. وغـرّدت بـُوم الخرابـه
ويالله انـي طالبـك يـارب وايديـنـك كريـمـه=تقشـع الغُمّـه عـن الاسـلام وإتزيـل الكـآبـه
وتـرزق الامـة برجّـالٍ معـه صبـر وعزيمـه=يجمـع الأمـه علـى نهـج انبيائـك والصحابـه

لا السيوف مثلمات ولاحرايرنا عقيمه=ومجدنا باقي لنا فصلٍ اخيرٍ في كتابه
مشكلتنا لاظهر فينا عظيمٍ او عظيمه=وقيل هم اعدا لنا , قلنا هم اعدا - بالنيابه -
قييمين ونتّبع من لالهم قدرٍ وقيمه=ونضحك لداب التبن لامن كشف من غيض نابه
مدري اكثرنا غبي والا نوايانا سليمه ؟!!=كننا حملان نامت بين أحضان الذيابه ؟!!
ندري ان افعالهم في امة محمد أليمه=ونْغفرها كلبوها ونتعاهد مع عصابه
ولو يزل اخوٍ علينا صارت الزله جريمه=نحمل سلاح الكرامه ونْتظاهر بالمهابه !!
ويوغورون صدور الاخوه بالوشايه والنميمه=ومن بقى مع مابقى له .. ياعذابه .. ياعذابه
اسقو سفوح الضغاين بالصراعات الاثيمه=وسمو الاشلا ربيعٍ واحتفينا في خرابه
راسمينٍ لاحتلال ديارنا خطه قديمه=وكل جيل يكمل اللي جيله الاول بدا به
حذر الله من مكايدهم بأيآتٍ كريمه=وفاضحٍ مايضمرونه ,, كل شيٍ في كتابه
هم لنا الاكثر عداوه والعداوه مستديمه=حاسدين المصطفى اللي طاهر الوحي انتهى به
ودنا يرضون لكن لو رضينا بالهزيمه=واتبعناهم جميعا , مابغو غير الحرابه
في نظرهم كلبونا حق مشروع وغنيمه=كل مانملك مباحٍ - في قيمهم - اغتصابه
نملك القوه ولكن إفتقرنا للعزيمه=واشغلتنا زينة الدنيا وكلن صك بابه
خايفين من الخساره , جت خسايرنا جسيمه=الخطر قرّب وحنا ما اقتنعنا باقترابه !!!