ياعايض الحب ماتدري وش علاجه= يوم انت ياصاحبي فاهم ولك خبره
وش حيله اللي منه تعقد حجاجه= اللي تعذب ومل من الهواء صبره
باسباب من تملك الخفاق وسياجه= اصبحت مثل القلم لاجف من حبره
يافرحه القلب وانتي مصدر ازعاجه= من شاف حالي نطق في حبها عبره
نيران حبك بوسط القلب وهاجه= والقلب كنك تدقه دق باالابره
انشهدانك ملكت الزين مع تاجه= ووصوف مامثلها والموت فاالنبره
ارفق ترا الحال مبليه ومحتاجه= واعرف كسير الهواء ماينفعه جبره
لاكن عجل ياعايض دور علاجه= مادمت فاهم واعدك صاحب الخبره

الحب يابو سهل خرّبت ميزاجه=سدّيت بابه عن العالم على كبره
معاد نلقى على دربك ولا حاجه=ترمي وراك العظام وتآكل الهبره
اللي تحصّله برا تقطع اوداجه=واللي يجي عندنا فالمجلس تحبره
وإن شفت لك وحدةٍ فالسوق غنّاجه=قامت عيونك علاها تنثر العبره
واليوم عقب ان حظك غابت ابراجه =تقول ياصحابنا شوفوا لنا دبره
الرجل يعرف لمدخاله ومخراجه=قدام يسقى من الحلتيت والصبره
لاكن راع الهوى معروف منهاجه=ما يترك الحب لين يحط في قبره

يابو سهل خل عنك العود واعلاجه = العود مافي يدينه حيله ودبره
كافيه مافيه .. لاتستقصد احراجه = مايعرف البنج ولا يضرب الابره
مِعذِر بسوق الهوى ومضيّع انتاجه = ياطيبه ان راح من بيته ليا الكبره
ناد المجرّب مثل عبدالله و ناجه = واخذ التجارب من اهل العرف والخبره
لاشفت لك ظبي تايه قرقع ادراجه = حاول تساير هواه بليّن النبره
ان شفته اموالفي حاول له تواجه = وجه لوجه لا يهمك صِغره و كبره
بعض الضباء لو عليه اقرون منعاجه = تراه ما اسهل من امذكّاته و صبره
وان شفته امذايري مع واسع افجاجه = خلّه وتلقى لك اظبيٍ على زِبْره