تسهيل يا عسرات الأيام تسهيل = الله يفرج للقلوب الحيارا
دنياك يا إبن آدم تهوّل تهاويل = تعطي وتاخذ من ضلوعك غيارا
أزريت أعدّل فيك يا وقتي الميل = وأتلاااااه باسبابك تركت الديارا
كم واحدِ يعجبك ناديه با الليل = ويفضحه بين الناس ضوّ النهارا
وكم صاحبِ شلنا عن كتوفه الشيل = أقفى وخلانا يهود ونصارا
وش لي جدا ياكود جرّ المواويل = وقصايدِ تقذف من الحلق نارا
إيوالله أبكي والليالي مهابيل = دارت ودرنا به يمين ويسارا
إيوالله أبكي وإفرحوا يا عواذيل = خليت غرسي يوم قطف الثمارا
الحُب والفرقا عذاب الرجاجيل = لا صارت أجمل من جميع العذارا
لا صار من تغليه يغليك با الحيل = وحل الفراق وجاير الوقت جارا
شوفه عليك أبعد من الجدي لسهيل = رايك مصادر فيه مالك قرارا
يلومني خبلِ مثل غارب الفيل = ما يفرق ردوف المها والحمارا
لا جاه ضيفه حطّ كيكِ بمنديل = وتلقا دلاله ناقصات البهارا
يا مزنةِ غرّا وبرق ومخاييل = تمطر على راسِ به الفكر حارا
ياما جرى لي في حياتي غرابيل = تشيب له روس العيال الصغارا
خالي عليه بعيد الأضحى هماليل = بيدي دفنته في ديار السدارا
يا تربة الغالين ألا ياملاّ السيل = أمرِ من المعبود للعبد صارا
يا راكب إللي ينتل الخط تنتيل = من عند وادي جوّ كا الطير طارا
قضّ المزفلت مع جنوبي تخاييل = وسنّد شمال الجوف من عند قارا
يلفي على قومِ كبار الفناجيل = كلّ المراجل من نباهم تغارا
لا جيتهم وصّل سلامي مراسيل = وإشرح ظروفي كل ما جيت دارا
لو ندّنا المسيار والا التعاليل = جينا ولو فيها جمارك مطارا
ميّر البلا شوفة رجالِ مشاكيل = له شرهةِ والحق مابه مدارا
يا إللي ترتّل آية الله ترتيل = إطلب لنا الله سر والا جهارا
وش هقوتك يا شيخ في غادي الخيل= هو به رجا والا دفنه الغبارا !
إقضب يدي يا شيخ ماعاد بي حيل = وخلّن بجنبك في صفوف الفقارا