هواها ويش اسوي في هواها=أنا اقرب وهي تبعد وراها

غدت مثل السراب بنون عيني=سحابه مير ماحصلت ماها

سكني حبها وأحرق فوادي=وهي ماهمها ولا علاها

تقول أن الهوا ماغير فيني=وجمر الشوق ما عمره كواها

انا يابنت لوني ما أحبك=ما أسج الرجل دايم في عماها

اعدي من طويله في طويله=وجاوبت الذيابه في عواها

كتمت الحزن مع طول الليالي=وبانت من خلاها في خلاها

نحل حالي وصار الحزن بين=وكل (ن) شك حالي وش طواها

وبعد كل المشاكل والبلاوي=وقفت وحارت اقدامي خطاها

عقب جاني خبرها في رساله=خبر يفرح عداي أن كان جاها

تقول المعذره انا حياتي=معك وصلت لعالي مستواها

بلاش من المحبه والصداقه=ودور لك على ناس(ن)تباها

انا حبيت غيرك والسموحه=وكل (ن) ياكل شواة(ن) شواها

وانا مدري فرح ولا تعاسه=بقوم ادعي لها وادعي علاها

وهذي دايم أخرة الحبايب=كتابة ليل والجهمه محاها

عسى الله ما يبارك فالمحبه=ولا من باعها والا شراها