قصة وارد عراوي

22-02-2016, 10:57 PM

نسمع كلمة وارد عراوي التي تطلق على الددسن ويطلق عليها البعض مسمى (أم عزيز) أكثر الناس لا يعرف من أين أتت هذه المسميات
البعض يضن ان سبب التسمية بعراوي لوجود الشناكير على جانبي الصندوق وهذا غير صحيح ،،،،،،،،،،

وسبب التسمية تقريبا
وأول من أطلق هذا اللقب هو الشاعر عسيكر الغنامي الروقي العتيبي
من أين أتى عسيكر بهذا اللقب ؟
القصة وما فيها أن عسيكر كان في عفيف أو في ضواحي عفيف فأتى اليه ابنه (ضاوي) يوماً وقال يأبوي شريت لي سيارة قال عسيكر وش نوعها قال ددسن قال من شريتها منه
قال من عراوي وكان عراوي هذا رجل مورد للددسن في عفيف والدوادمي وكان عراوي يلقب أبو(عزيز) لأن ولده عزيز
قال عسيكر لأبنه ضاوي مبروك ياولدي الموتر الجديد وحنا معزومين عند فلان العازمي
وفي الطريق غرزت الددسن في رمل وحاولوا فيها وبدون فائدة ومشى عسيكر على رجله متجه نحو بيت معزبه العازمي وترك ضاوي عند الددسن وأنشد هذه القصيدة التي صارت سبباً في مسمى الدادسون بوارد عراوي أما مسماها
(أم عزيز) نسبة لأن عراوي إسم ولده عزيز وأطلقوا أم عزيز لأنها مؤنث ،،،،

وهذه قصيدة عسيكر الغنامي :

لعنبو ذا الزول ياوارد عراوي=كيف غرزتي بنا وانتي جديده
الدروب مهود ما فيها ملاوي=والكفر نايلون والسايق وليده
تطلبين اثنين والخط متساوي=جعل ما يبقى حديده مع حديده
الحموله كيس والسواق ضاوي=والرفارف خوص والشاصي جريده
خاب ظن اللي هقا فيك الهقاوي=عقب صرتي في مطاليبه بليده
وكل شيٍ يخلف القلب الهواوي=يوم مضنونه سكن دارٍ بعيده
باتمنى وليتها لي بالمناوي=يختلط ماها بزيته مع حديده
لين تِعجز راعي الطب المداوي=لا بغى توضيبها يفجر وريده .

القصه كما وصلتني في ذمت الراوي