تكفون يا اهل المنتدى ..

الصوت منّي :

( تكفون يا اهل المنتدى )

ابا اركب الصّعبه علشان موضوع = لو كان ماني هاقياً بالنكوفه
تكفون .. يا اهل المنتدى جالي اسبوع = ما ارقد ولا اقيّل وأعيش بكلوفه
لا ينزل الموضوع .. خلوه مرفوع = من شان محبوبي ليا جاء يشوفه
لي قصّةٍ صارت مثل حبّة الكوع = لاحدّت الرجال سطوة ظروفه
اغوتني الدنيا على فتح مشروع = قلبي رساميله وهمّي قطوفه
مشروع حبٍ غصب عنّي بلا طوع = انقدت له من غير عذر وحسوفه
ورعٍ حفر صدري بشلفا وفاروع = واخلف كياني واعتذر بمعروفه
اعطش لصوته ثم على شوفه اجوع = واحن له مثل الخلوج العطوفه
وارقد على طيفه دقيقه ثم افوع = واغمّض عيوني واخايل وصوفه
بالله قولوا له ترى القلب مفجوع = واعروق قلبي صايبتها نِشُوفَه
امّا يُعُود وكل ما فات مرجوع = ولاّ يوادعني .. بلمسة كفوفه

والصدى من الشاعر القدير/ نايف العبيد :

صحّيت ساحر عبقر وجاك مفزوع = حضر عشانك والخنازب تحوفه
جمّع على شانك من الوادي جموع = يقودهم حبريت يقرع دفوفه
آمر تدلل أمرك اليوم مسموع = فصّل وحنّا نلبس اللي تشوفه
أبشر بعزك كلنا لك دروع = اللي مثل شرواك ندعم صفوفه
كانك شكيت الليل حنّا لك شموع = وكانك شكيت الحظ نصنع ضروفه
وكانك وقعت وطحت في حب دلوع = عمم عليها واعتبرها مخطوفه
نجيبها لك لو حوالينها ربوع = وأخوانها تشهر علينا سيوفه
أو نسترق أخبارها ونرسل نجوع = تنقل رسايلها وتنقل ظروفه
الخوف من قلب العفاريت منزوع = لعيون عبدالله وحبٍ يلوفه
بس المهم تشرب من الريق قرطوع = وتكحل عيونٍ بالجميلة شغوفه
الشوق مثل القيظ والوصل ينبوع = والحاذق اللي فرصته ماتطوفه

صح لسااانك لين ترضاء
صوت وصدى ويلوم الي يلومك

وصح كلك وصح من جاراك تقديري والاعجاب كله

الله الله ياسلام يابو مشعل
صوت وصدا ولا اروع صح الله لسانك ولسان الشاعر نايف
اابداع وجزاله تستحق الوقوف والتميز
تقديري لك
النجلاء

صدى وصوت راآائعين ،،
سلمتوا وصح ألسنتكم ،،
تقديري ،،

صحت السنتكم صوت وصدى رائع

تقديري لكم

سلم بوحك وقلمك
بانتظآر المزيد من فيضكـ
تحياتي واحترامي

صحت ابدانكم ومشكورين على التواجد العذب

تقبلوا تحيات مغليكم

صوت وصدى في غايو الروعه والشموخ ابداع منقطع النظير
صح لسانك ولسان نايف
تحياتي وتقديري