بين الحنايا

10-07-2016, 08:24 AM

قال من بين الحنايا جال همه=من لهيبن بالحشا يشعل اشعالي
من كثر ضيقه تزايد ضغط دمه=من صواديف الزمن ماهو بسالي
عزي لقلبن بلي لايام خمه=حظ من قلبه من الاوجاع خالي
والسبب وقتن جلب حزنه وغمه=عزي لحاله وياعزي لحالي
اشهد ان تالي الزمن جاب المطمه=انقلب حاله وصايبه اختلالي
به تسيد كل مفرودن من امه=وشاخت ضباع الخلا به والثعالي
والردي كبر علي راسه معمه=وعد نفسه من مداغيش العيالي
والمراجل كايده بيرن وجمه=منهلن ما ناشه قصار الحبالي
الصقر طبعه يتوق لكل قمه=رف جنحانه وحوم بالعلالي
من طمان القاع له شومه وزمه=ماكر في كل رجم وراس عالي
والكفو للعز به عزمن وهمه=ما توطي هامته سود الليالي
يوم هافي الحيل خاب ومايهمه=غير هرجن بالقفا قاالت وقالي
شغلته بين العرب نقال نمه=مثله وشرواه جعله للزوالي
وانت ياللي متجه من غير يمه=خاب منهاجك وغااشيه الظلالي
اختلف علمك وضيعت المهمه=وهيفت شمسك ودنت للزواالي
عيبك ان مابك ضمير ولا اي ذمه=نيتك سودا وللهزله مواالي
والوجيه اللي تباري لك مرمه=ماتفرق في الحرام وفي الحلالي
جعل ناب الداب فيك يبث سمه=ويتمثني منحرك حدب السلالي
مجلسن جاء للهلايم فيه لمه=من عقب مايجمع زحول الرجالي
ذا زمانن بدل الفتحه بضمه=كل علمن فيه يدرج بالريالي
كم رفع بالمال جلحوطن ورمه=مثله اول ما تصب له الدلالي
ما بقي غير اختم لقافي واتمه=والسلام ختام هرجي والمقالي

حمد بن سايمه

ريوف ,آســ ت ــاذ الــ ح ــب ,الملكة و 1 آخرون معجبون بهذا