قم ياقلم وأكتب من الفكر هوجاس=وخل الكتابة بالحروف أبجديه
ورتب هواجيسي بترتيب وقياس=ولا تختلف وزنتك روحه وجيه
وخلك على ظني تعابير وإحساس=وخل المعاني خافيات وقويه
اللي يبي يمشي طريقه ولا قاس=بُعد المسافة راح وقته ضحيه
وأنا رجل خيال وأختار الأفراس=الطيبات اللي أصول عربيه
وفي ماقفي ماني ذليل وبلاس=تلقى شدادي فوق ظهر المطيه
أسابق أيامي بهمّه ولا باس=وأحضى بِعِرف أهل الوجيه النديه
والعرف والعراف من كل الأجناس=نفسي بهم لا شك دايم هنيه
والدار يا هل الدار تَكرم على الراس=ماني مدور في ذراها رديه
لا جيت متغرض ولا جيت عساس=كريم واحمل روح حره أبيه
لي مع هَل الطالة مواقف ونوماس=غاوي هّل النخوة رجال الحميه
شاعر ولي قلطه وعايش مع الناس=وماني بساري فالدروب العنيه
وربعي رجال الطيب والأصل والساس=اللي لهم نفسي تّقدّم هديه
أعلنت في درب الردى معنى الإفلاس=ولا عاد لي رغبه بكل البقيه