قصيدة نار الولة

26-12-2025, 12:27 AM

الـبـارحـــه في الــخـــفـــوق النار شعاله
نار الـولــه والـعــشــيــر ابطت مراسيله

وازريت عقب البطا في الصبر لا احتاله
مـعـذور مــالـــه على كـبـت الـولـه حيله

يــفــوقـــه الــشــوق والاشــواق قـتـاله
كـم عـاشـقـاً مات مـن خابت محاصيله

وأكـبـر بـراهـيـن قــولي يـا هـــل الطاله
اللي خــذا الـصـيــت واتفوق على جيله

مـجـنــون لـيـلى بـعـد لـيـلى فـقـد حاله
وليلى على الـقــبـر تـقـصـد له وتبكي له

وعاشت بعد قـيـس يــوم بـحـال يرثاله
ومن واهج الـشـوق لـحـقـت به بعد ليله

والا أبــن عـــدوان في حــلــه وتـرحـاله
قـصـه لو الـصخـر يـسـمـعـهـا بـ يرثي له

ما بـيـن غــيــرة نـسـاء الـديــرة يـورا له
غـدر الـقــرايــب وابــن عــمــه واشاكيله

واقـفـا عــن اديــار ابــوه وعــمــه وخاله
للـبــعــد حــــده ردى شــبــلـي وتـطـبـيله

مـن ديـرتـه مـا رحـل خــايــف على ماله
لكن شــرا حـمـود بالـشيـخـه ولـو هي له

اقـفـا مــهــاجـــــر مـــع وضــحى وجهاله
وقــلــط على شــيـخ طــيـبـه سـر تجليله

وبـعـد اشـتكت داره امن الـغـزو واهواله
نـادت على الـــنـمـــر تــتــوســـل بتعجيله

وما خـيـب الـظـن نــمــر وحـمـلـهـا اركاله
متنه يـــوم حـمـود مــا يــقــوا على شيله

بالسـيـف خــلا الــعــدو يـرجـع عـن امناله
يــجــر ذيــل الــهــزيــمـــه بـعـد تـنـكـيـله

وبالـنــصـر فــاز الـنــمــر وحـمـود وارجاله
وقـضــوا بالإفـراح شـهـراً صـعـب تفصيله

وبعد انـقضـا الـشـهـر لد الـنـمـر في اعياله
بـعــيــون مــن للــمــفــارق ســـارجــاً خيله

الــشــوق شـــد الــنــمـــر للـقـدس وابطاله
رحـلــه عـسـاهــا تـهــدي الــشـوق وتـزيـله

وقــضــا لـــه أيــام لــكــن جـــاتــه إرسـاله
وضحى من الـشـوق تـنـخـابـه وتـشـكي له

في عــتــاب خــلا دمـوع الــعــيــن هـمـاله
خـــلاه يــسـتــاذن الأقـصى وافــاضــيــلـه

ويــعــود يــطـوي فـيـافي الـضــفـه الحاله
فـوق أطـيـب الـخـيـل في فـعـلـه وتأصيله

يــســوقــه الــشــوق للــقــا الـبـدر واهـلاله
واسهـيــل من خـلـفـهـم واقـف ويمومي له

وبالـدرب شـاف الــنـمــر في الليل مـا هاله
شــاف انخسـاف الـقـمـر في صـوره امهيله

وبـصـدره الــضـيــق قــام أيـــوثـــق اغلاله
في مــشــهــد ازرا نــجــوم الــكــون تمثيله

وحـث الــخـطى للـوصـل واللي شـغـل باله
شــافــت عــيــونــه بـجـمــع الـربــع تـأويله

وضحى بثوب الكفن في نـعــش يـشــتــاله
قــبــيــلــة الــنــمــر لا آخـر بـيـت تمشي له

وطــاح الــجــبــل مـنـكـســر واللي تـبـقـاله
اســهــيــل وأهـــلال بـيـت الـحـزن مبني له

وابــــــوهـــــم اللي الــيــا مــن جــــر مـواله
مـا غــيــر وضحى من الـشيـخـات يطري له

وضحى غــلاهـــا خــفـــوق الــنــمــر منزاله
واللي تــبــا بــيـتـها في الــقــلــب وتـجي له

تــــرجـــع لا أهـــلــهـــا وتـبــقــا للأبــد عـاله
تـعــيــش في بـيـت أبـوهــا بــعــد تـفـشـيله

هــذا الــغـــلا يــا ولــيــفي وانـــت تـخـتـاله
في خـافـقــاً فــيــك ما خــابــت مـحـاصيله

عرشك في الـقـلــب رغـــم الــبــعــد ما طاله
غـيــرك ولــو نــافــســك بالـمــكــر والـحـيـله

وبـرهـان قــولي يـا سـاس الــزيــن واخصاله
أن الـــحـــشـــا قـــــادني لك قـــبــل تـلـفي له

يا غــــايـــــة الــعــــيـــــن والـخـــفــاق ومناله
جــــيـــــت امــتـــرجي مـعـك في الليل تعليله

الشاعر بشير العتيبي