شاعره ماهو من الحين من وقتٍ قديم=والهنوف اللي مدى الدهر خاطرها عيوف

طول عمري ما طمعت برياجيل الحريم=منوتي من لا عرف غير سلومه هنوف

ولا ارتضي غير أحمر العين لي خل ونديم=من ردي البخت واللاش وابن اللاش أوف

ولا اشتكي من جاير الضيم لو همي مقيم=ولا أتبع الماضي كثير العزاير والحسوف

أكتم الحسرات في داخلي والله كريم=يجبر المكسور ويضمّد الجرح النزوف

لا شكيت الهم وجروحي اللي ف الصميم=تستغل نقاط ضعفي عبادٍ ما تروف

لا أضعفتني سود الأيام والحظ السقيم=ولا أنا يا سعود مانيب من ناس ضعوف

لابتي يوم الملاقا يضدون الخصيم=بالرماح وبالقنا والبنادق والسيوف

ماربى فيهم ذليل ولا فيهم غشيم=مزبن الجالي عن الدار ريف للضيوف

والدهر ماهو على حال واحد مستديم=نوب يسعدنا ونوبٍ يورّدنا الحتوف
‏