بين الحقيقه والخيال وبين تحقيق المحال=هذا شعوري يوم شفتك بعد ما أيّست منْك
دهر القطاعه بيننا لو احيته سحب الوصال=يبقى شقى وطعون غدرات الزمن سيستم زمنْك
الخوف ماهو بُعد شرق المملكه عن الشمال=متى منعني بُعد دربي عنْك يوم ابعدت عنْك
الخوف ياطاح النصيب وحالنا بِدّل بحال=وافلست منْك افلاس راس المال باسهم كل بنْك
يا كم مرّه في زمانٍ ذكرياته كالخيال=أشّرت باصبع للفؤاد وقلت لك هذا وطنْك
الصد عنّك ما عطيته حتى لو ربع احتمال=انت الحبيب اللي خفوقي بين خلق الله حضنْك
يا شبْه بدرٍ بان في صافي الليالي باكتمال=خذ هالقصيده من جديدي وغنّها على لحنْك