ياواهس الشعر نفسي لاتفتِّشها = خل الخوافي سِكَنْها داخل الجاشي
في وجه غيرك مصككةٍ درايشها = خوف النقايد وهرج اللاش والواشي
وأنته فهقت الضلوع وقمت تنبشها = وسبرت قلبٍ من الأيام منداشي
ماقول عيني دموع البين ناهشها = ماصاب قلبي هيامٍ صاب عَكَّاشي
مير أنت عيبك عروق القلب تنتشها=نتش المريض المنوَّم داخل انعاشي
وتعيد نبض المواجع لين تنعشها = تِرزم عليها القريحة كنها الناشي
من عذب ربانها جتني مطارشها = اتسابق العين قبل تخيط الأرماشي
منها دلال الشعر فاحت وأنوِّشها = قناد فكري وأسوق الكيف لاغاشي
أعرف سعر سوقها مانيب ناجشها = أبِيع وأشري مع الشعار بالكاشي
ماكل من يبغي الجزلة يحوِّشها= الطيِّبَة غالية ماعاد تنَّاشي
يابحر ياللي قلوب الناس خارشها = بلِّغ سلامي على موجك ليا طاشي
من قاعك اللول والمرجان أخششها = سلك المعاني وأخيِّطها على قماشي
تجوز لأهل النظر والعين تدهشها = نتعب على الطيِّبَه مانجمع قشاشي
مندوب ياللي حزوم البيد تفرشها = تحت الذي وقفته بظلال وقراشي
لكزس كبود العرب دايم معَطِّشها = اليا انطلق سرعته عبرود بكلاشي
وصِّل تحية من الأعماق ناقشها = أعذب من الديمه اللي وبلها رشاشي
للصاحب اللي دروب الطيب حايشها = القلب غبة بحر والراس شوَّاشي
وقله يابو تركي العالم نعايشها = نعرف زحول الرجال ونعرف اللاشي
وليا جهلنا أمرها قمنا نناقشها = أما طَلَع حر ولَّا طير خفَّاشي
لاشاف زلة رفيقٍ له تناوشها = واستاقها سوقة الوبَّال للحاشي
في كل مجلس يبرِّكها ويَعـْرِشها = لو إنها ماتِمِخ ولابها عراشي
دستورنا في الهِزال إنا نطنشها = لاجات من واحدٍ بأفكار حَشَّاشي
حتى هروج الردا عنا نكلبشها = وانْحِط في بابها ضَبَّه ودفَّاشي
ناسٍ تبذ الخفا والموت يقرشها = ثم يسكنون اللحد وترابه فراشي
وحسابهم عند من يرزق هوايشها = محيي رميم العظم عقب أصبح طْشاشي