لافج نور الشمس وإنزاح الدجا = عيا يموج الضيق يالله الخراج
القلب يجلد بين ياسه والرجا = وترجد به الايام ويجيه الخلاج
لاخاط ليله من عذابه ما نجا = ولاجاء نهاره لآج ماحوله هجاج
الهم يردج واسود الضيق يهجا = يالين صار الحلو بالدنيا هماج
حتى وليفي باشة الغنج ادعجا = اطفى على كف الهوا ضو السراج
أبو جبينٍ حرج واللون اثلجا = اقفى ولالي عقب مرواحه ملاج
ولاياوجودي وجد عود مبنجا = لاله قريب ولا طبيب ولا علاج
اضحيت مثله في حياتي محرجا = حدتني الدنيا على نفح العجاج
ويالله ياللي لك ملاجي واللجا = إجعل لي المخراج يالله الفراج

ياحظ من لاضاق ضيقه دقايق = ويرضى يلو انه تعثر لزومه
ماهو بمثلي دايم الدوم ضايق = ضيق عليه الوقت ياللي تلومه
لاياوجودي وجد من طاح عايق = لاجاء يبا ينهض تردت عزومه
او وجد من خلي بوسط الحرايق = محدٍ فزعله من مطاليق قومه
ويا جر قلبي جر صوت ابن شايق = لاقام للشعار شمر كمومه
البال لاخاط اسود الليل وايق = صوب الطويله تدفعنه همومه
ماهو بمبسوطٍ ولاهو برايق = صكت عليه همومه اللي تحومه
ياللي من حيود اقشر المر ذايق= الصبر رجلٍ غانماتٍ علومه
الخبل لاجارت عليه العوايق = بيح سدوده لين بانت غمومه
واستاقها اللي للمناقيد سايق = لين استقرت والنذل طاب نومه
ياجاحد المعروف بين الخلايق = ليه الردى في ما تخفى تسومه
لنته ولد لاشٍ ولنته ببايق = مير البلى ياجاهده فيك لومه
الصقر يربط بيننا فالوثايق = خصه طلبنا ما طلبنا عمومه
واليوم بانت واضحات الحقايق = والنفس من خوف التشره كتومه
والخبل من خلف الحجاب يتهايق = والنذل ناره والعه في هدومه