ياهاجسي فِجّ لي باب الشّعِر فِجه = عطني ثمين البيوت وكبّ سامجها
اجادل الناس بالبرهان والحجّه = والكلمة الطيّبه تثمر نتايجها
لابارك الله فالازعاج واللجّه = والكذب والهرجه العوجاء وهارجها
اللي ليا سمع حاجه طار فالعجه = ماعد يدري حروفه وش مخارجها
والوقت مايدري ان الناس محتجّه = يمضي على الناس واركابه يدرّجها
احدٍ مع الوقت يمّ الخير متوجّه = ميقن ليا ضاقت ان الله فارجها
لاضاق صدره توكّل والقدم سجّه = على دروب الرجاء يطوي مناهجها
والسرّ ما بيّحه والمرّ ما بجّه = من خوف نفسه ينزّلها ويحرجها
و أحدٍ ليا قلّ حاله صار به رجّه = لعب به ابليس والعالم تولّجها
يصير عزمه ضعيف وضاع فالدّجه = نفسه من ادناة سقطه ما يخارجها
ويالله دخيلك وعبدك طالبك نجّه = وروحه بحسن الختام انّك تتوجها