.... قالو تغزّل ....

بسم الله الرحمن الرحيم

السلام عليكم ورحمة الله وبركاته

صباح / مساء الخير للجميع

قالو تغزّل قلت ماللغزل دور=في دنيتي ماله مكان ومجالي
شعر التغزّل فالغنادير محضور=لاهوب هملي ولاهوب فالي
أنا على الوقفات للذيب مخّبور=ما نضّم القيفان لجل الغزالي
وراع الهوى لا حب ماهوب مجبور=بالشعر ياصف زين بنت الحلالي
ياصف مفاتنهى على الناس بشعور=ويوزع الصوره برسم الخيالي
ويقول أغار ولا حصل مني قصور=ويغتابها بالهرج لا جا مجالي
وتروّح الغيره مع الهرج وتبور=وينقض كلامً قال بول وتالي
يامن بلاك الحب عندي لك الشور=أستر على حبك وخله مثالي
الحب بين أثنين لا صار مستور=هذا الهوى ماهوب حب الهبالي
وأنا على الهزلات مانيب مامور=أبعد عن الهزله ورود المعالي
مالي ومال الصم والبكم والعور=ياالله أتجنبني دروب الضلالي
وختامها ياجعلنا من هل الحور=في جنّة الفردوس ننزل بعالي

بدر بن الحميدي