قالوا عرب !

السلام عليكم وكل عام وانتم بخير
اقدم لكم قصيدتي ( قالوا عرب ) وارجو ان تحوز على رضاكم
مناسبة القصيده : عندما قام العراقي المدعو ( الزيدي ) بقذف ( جورج الابن ) بحذائه
اكرمكم الله ، في مؤتر صحفي . والعجيب ان بعض العرب فرحوا جدا وكأنهم حرروا
العراق او كأنهم انتصروا في معركه :)

في سوق ما أحد(ن) يفتح (السوم) بريال = والأرض (عُمله) والاوادم (عموله)
ناديت لـ (إثنينه وعشرين) دلاّل = من عالم إثنينه وعشرين دوله
معي بضاعه للعرب تُضرب امثال = لأوّل سلاح إستخدموه بسهوله
عقب السلاح المزدوج سيئ الفال = هذا (برخصة) ثابتة وامحموله
راعيه الأول من مشاهير الابطال = فايز على (بوش الولد) بالبطوله
يوم الامريكي قام يزهى ويختال = سدّد لخدّه وحدة(ن) من نعوله
وشفت العرب من كثر ماذاقوا إذلال = سمّوا على اسمه وارقصوا واهتفوله
(أمحق) عرب و(امحق) طموحات وآمال = ان كان هذا نصرنا اللي سعوا له
وش عاد اقول؟ وما بقى شيء ينقال؟ = الهرج يقصر والقوافي خجوله..
والحال مايل ..والعرب ليلهم طال = والوضع مزري ..والامور إمعفوله !
وحنا نقول انّا طحاطيح وإرجال = (حسَب) ، مقاييس العرب للرجوله
تثبت رجولتنا (بطاقات الاحوال) = والدّم راهي فيه : ( جين ) الفحوله
وكل(ن) على (ليلاه) يسري بموّال! = وكل(ن) على (عمياه) يشعب ذلوله!
متى تصير اوضاعنا عالي العال ؟ = ومتى الكلام اللي نقوله نطوله ؟
نحتاج حلّ ولو حصل بألف حلال = من راس (عبدالله) ترى الحل حوله
واللي يمينه دام عزّه ولا زال = (سلطان) سيف(ن) ماضيات(ن) فعوله
ان قام قمنا له خفيفين وإثقال = ناخذ على العدوان صوله وجوله
معه مثل سيل(ن) من الجال للجال = من ماه وديان الكبود مغسوله
أمّا انطلق منّا الوجع (طلقة إعقال)؟ = وما نرجع الاّ والأمور إمحلوله !
ولاّ تصير افعالنا دون الأقوال = ونبقى عن العالم شعوب امعزوله
رجّالنا .. ماعاد يشرب بفنجال = يصبح ويمسي عورة(ن) في إهموله
قلته وعندي حل واضح وفعّال = نتبع كتاب الله وسنة رسوله
وانزيّن النياّت وإتزين الاعمال = ويصير يوم بقوّة الله وحوله !
والمسألة لو هي على حذفة إنعال = تلقى العرب كل(ن) مضيّع نعوله!