هنا .. سجن القوافي !!

مساء الخير للجميع
قرناس والله ما ادري وش تكلم عنه ولا لاحظت عليك الا كل علمٍ غانم ولا شفت احد قال عنك غير ذلك
هنا ياقرناس تسالي رغير مافيه عند الجميع اي حساسيه انا متاكد وامون على اكثر الربع والربايع ان لم يكن كلهم
لاتصير حساس ولاتصير شاعر خلك متخصص بالتناتيف فقط
خيال مطير ياحبك للمطولات لكن شاعر وراعي صنف
نور يابعدي على هالوجبه الحراقه يستاهلون بالقيض وهلابك
الفراج حياك واستمتع زي ما انتا عايز

شاعرة نجد ,رحيل ,النجلاء معجبون بهذا

شطحة القايله

أسمع كلامي لك يا ناصر وانا أبوك

من قبل صعبات الأمور اتشابه

مثل الذهب حكي إلى جاك مسبوك

تجارب والعمر فاتح كتابه

ترى الليالي بين هقوات وشكوك

مابين عدلات تجي وانقلابه

أحسب حساب الوقت لا يبرك بروك

مهما صفى لابد تحسب حسابه

قبلك اباطرة وسلاطين وملوك

الكل عقب العز وقته غدى به

وسلاحك اما صار جاهز ومفلوك

والا تجيك من الليالي أصابه

ودرب العمر وعر ومليان بالشوك

ولا يسقي الضميان شوف السحابه

وان جاتك العسرات لا تصير مضنوك

دنياك تبغى قوم عزم ومجابه

الجووهره ,ناصر الهواوي معجبون بهذا

ياناصر بن عبيد انا شفت لي زول = سبحان رب(ن) صوره جل شانه

سايق فواتير التلفون بالمول = وكل(ن) تسمر يوم شافه مكانه

وجانا مطوع قصده النصح بالقول = لكن تبلعم يوم شافه وزانه

تقول كن الحلق والزور مقفول = او انعجم ولا انربط في حصانه

تايب ولكنه نكس عكس مدبول = خلى المطاعه كلها والديانه

من كثر مابحلق عيونه غدن حول = واطلق عيونه وامتلت بالخيانه

شاف الجمال اللي غدى منه مذهول = وصار افتتانه منه صار افتتانه

صار افتتانه من خشيف(ن) خذا عقول = عقول روس ثاقلة بالرزانه

خفت من الظبي العفر ياهو يهول = ظبي(ن) رتع بين اللهد والطمانه

ريان عود(ن) كمله زاهي الطول = تقول عود الموز والخيزرانه

مظمر السرجوف والخصر منحول = ناعم معزل عمر ويا ليانه

والعين عين الريم والخشم مسلول = ومبيسم(ن) كاالتوت لولو ثمانه

وصدر(ن) زما وماني عن الوصف مسؤول = والعنق يذبح بارقه ولمعانه

وباقي وصوف(ن) تجعل الرجل مهبول = لو قلتها بتقول ماني تكانه

وان كان به ريق(ن) مشير ومعسول = مااظنه الا بشفته وبلسانه

وان كان به جسم(ن) به المسك محلول = او به نفس كفايح الزعفرانه

فماهوب معقول(ن) وبه صار معقول = حور(ن) من الجنه مزج في كيانه

ياحظ منهو صار وياه معزول = يرعى ربيعه ذايب(ن) في حنانه

ومن يوم شفته بس اهذري بلحول = صار الذكر (حوقال) ويا استعانه

الحول دار ودار بعده بعد حول = ساعة ويوم وشهر ويا زمانه

ولليوم وهو لاعب بفكري على طول = مافيه غيره شل فكري وهانه

ياناصر بن عبيد انا ادور احلول = تكفى زهمتك والنصيحة امانه

الجووهره ,رحيل ,النجلاء و 1 آخرون معجبون بهذا

ناصر الهواوي

ارحب يالخيال

هات القلم والمحبره وابسط البوك=اصابعي مشتاقةٍ للكتابه
لافض ياخيالنا هالمسا فوك=لو انت عن من قالها بالنيابه
قلبي خضر والهجس ملقوف انا اخوك=وفي هالفلك ما كل شي يتشابه
اجمل ما اراه القاف لاجاك محبوك=والصمت لي يعني بداية كآابه
عندي خيال بحافة الجد مشروك=للي مضى مع حاضري به قرابه
والدرب قبلي يا احمر العين مسلوك=كم فارس وشيخ وزعيمٍ مشى به
لو من على بالي تمشو ومروك=عوت بصدرك يالزعيم الذياب

الجووهره ,شاعرة نجد ,رحيل معجبون بهذا

صح لسانك يالخيال
ــــــــــــــــــــــــــــــــــــــــــــــــــ ـــــــــ

انا اشهد انك يا احمر العين معلول=او قلبك استرجع بشوفه اجنانه
مهفهف السرجوف والعنق به طول=وقدٍ وخد ومنطقه به ليانه
حتى مطوعكم منه طق به جول=انا ما الومه لو تزلزل كيانه
وش جابك لبقعٍ من الريم ماهول=مالك ومال يادان ياليلدانه
اجل ماكنت العام يالشاطر اتقول=لوضاخ ابا اسافر واحفر الامانه

انا مروعني سلطان الهاجري بقوله
ماني من اللي يسرد السالفه سرد====ليا امتطاها ما يوقف ذنبها
وجيتك بالزبده واعزرني لانك استقصيت القافيه ما خليت شي هههههههههههههههههههههه

الجووهره ,رحيل معجبون بهذا

اسعد الله مساكم بكل خير ياآل الرواسي
أبو عبيد جزاك الله خير ومانبي غير دعواتك طال عمرك وصح الله لسانك ودام ابداعك
خيال حضور جميل وتسالي رائعه ومميزه
الجوهره تسلمين على التسالي الذوق ياذوق ولاعدمناك يالغلا
قرناس الحرار انا والله مافهمت شنو السالفه ومايجي منك الا الطيب ياخوي
نور ياهلا والله ومرحبا بك وتسلمين ع السفره المولعه شكلك ناويه على المساجين بالاعدام ههههههههه

الجووهره ,ناصر الهواوي ,رحيل معجبون بهذا

تسليـــه

الجووهره ,رحيل معجبون بهذا

تسليه

الجووهره ,رحيل معجبون بهذا