تعريف الطيب

أحبتي الرواسيون والرواسيات

صباحكم/مساؤكم خير ، وشعر ، وعطر ، وحب
أعتذر منكم أيها الأحبة لانـقطاعي خلال الفترة الماضية بسبب بعض المشاغل والظروف ، ويسرني أن أصافح أعينكم وقلوبكم بهذه المتواضعة التي نظمتها في مدح أحد الرجال القلائل في هذا الزمن الذين تُقضى على أيديهم حاجات الناس ، فقد أتينا هذا الرجل في موضوع يخص أحد أقاربي فلم يتوانى ولم يتأخر بفزعته التي لا تستغرب منه ومن أمثاله ، إنه الشيخ/مشعل بن محمد بن صقر العطاوي العتيبي ، وقد جاءت هذه القصيدة شكرا لموقفه وثناء عليه ، فمن لايشكر الناس لا يشكر الله.



(يامن بغيت لمنطق الطيب تعريف .. الطيب هو: مشعل مْحَمْدِ العطاوي)

أبدأ بذكر مصرّف الكون تصريف=ربٍ على عرشه عزيزٍ علاوي
وأثني تراحيبي من السيف للسيف=باللي على العليا شفوقٍ شفاوي
يا مرحبا يا مكرم الجار والضيف=يا مشعل بن محمد بن العطاوي
حرٍ تسلسل من حرارٍ شواحيف=من روس ربعٍ يبعدون الهقاوي
من راس منهو يرتكي للعواصيف=حرٍ شهر من وكر حرٍ نداوي
نسل الكرام اللي تغيث الملاهيف=له موقفٍ ياصل صداه الصداوي
وله فزعةٍ تطلق سراح المواقيف=وله وقفةٍ ترهي رجاوي الرجاوي
عز الرفيق وعز من يشكي الحيف=وعز الضعيف إن كبرت أم البلاوي
كم واحدٍ دنياه ما جت على الكيف=ويومه نصاه الصعب عاد متهاوي
وكم واحدٍ كثرت عليه الأراجيف=وضاقت به الدنيا وهو حيل ثاوي
ويومه وصل مشعل تلاشت مع الزيف=وأمسى على العليا كثير الرهاوي
وكم واحدٍ حدّوه بعض الملاقيف=منّا ومنّا ولا له إلاّ المناوي
ويوم ارتكى له والركايب مواجيف=ضاعت علوم أهل الحِيَل والدعاوي
قال: احتزم بي للثنادي وأنا آقيف=والله ولو طالت عليّ الخطاوي
لأجيك بعد العيد من غير تكليف=وأقطع حبال أهل العلوم الدناوي
بالجاه وإلاّ المال مامن تخاليف=أبشر بما يرضيك وإبليس غاوي
ووالله لو زادت عليّ التكاليف=ما عنك صدّة لين أردّ الشواوي
وجانا ولا قصّر زبون المعاريف=أنهى الأمور اللي لها الذيب عاوي
أنا أشهد إنه فاق كل التواصيف=لكل الأمور الطيبة حيل قاوي
تنشر له البيضاء بروس المشاريف=على الجهات الأربعة بالتساوي
ويامن بغيت لمنطق الطيب تعريف=الطيب هو: مشعل مْحَمْدِ العطاوي
ربي خلقه ولا تقولون لي كيف=مابين مكسر عنبر وعود جاوي
متميّزٍ عن كل نقّالة السيف=بإنه على العليا شفوقٍ شفاوي
يحبها حب العشاشيق للصيف=وعن ما يشين النفس خَجْلٍ حياوي
ويا ناس لوّ أمدح من عْمان لطريف=ما أحصيت أنا فعول الكريم السخاوي

حسين السبيعي