لك الحق ...

السلام عليكم ورحمة الله وأسعد الله أوقاتكم
والمعذرة يا تاج القصيد من زمااان ما طرقنا بابك ..
وعسى هذه الأبيات تشفع لنا الغياب ،،،
^-^
لك الحق وما يلحق وعذري على المطروق
من الهاجس اللي صاغ عذره بطاروقه

وباقة ورودٍ من يده فايحة بالشوق
ويحمل جميل العذر بالكف ويسوقه

خذته المشاغل كنه السهم وسط السوق
على السّلّم الصاعد والأرباح مسروقه

ليا جاء بيشري قال سهمك صعد لك فوق
وفي البيع تهوي كنه السهم ومْرُوقه

وسوق الهوى بورصة وتحييه ذات الطوق
توجه سهام الحب من قدّ ممشوقه

وتغريه من طرق الهوى والأدب والذوق
وتشعل هجوسه والهوى يلتهب شوقه

ويصرف غريم الحب من قلبه المخفوق
ويسحب من المحسوب خزنات صندوقه

وأنا والله إني عاشقك وأنت لي معشوق
وقلبي رهنته صار في يد معشوقه

خذ العلم من قاصيه وأنا على المنطوق
لسان الفتى يربط عهوده وموثوقه

طردنا سنينٍ فايته والطرد ملحوق
وما فات فايت والعسل ودي آذوقه

ألا ليت شعري يوصِل الأمنية وآروق
وتاصل لمن يعناه شعري ومنطوقه

وأنا خابره يخبر خفى صدري المشقوق
ليا أجتزت سوره وجّه السهم لي صوبه


***^-^ وسلامتكم ^-^ ***

عبدالله الصقري معجب بهذا