نبى نتقهوى .!

اليوم بعد صلاة الجمعة فتحت الفيس بوك قبل يحطون الغداء وراسي مصدع من الضرمة على القهوة
واول ما فتحت الصفحة من الاب توب ولا هذي الصوره اللي فوق ومن منزلها

الشاعر حامد المالكي وكاتب على الصوره

(( من يتقهوى معي.))

ومن محبتي لشاعر عبدالرحمن الماكي ابو احمد ونواف جارالله

اشوف كل شعار بني مالك في صورهم لان الميانه

قاطها بيني وبين اللي ذكرتهم حتى كنت كل يوم في هواش

مع ابو احمد مابيه يشارك في شاعر المليون ههه

وجات هذي الابيات واعتقد ان الشاعر حامد المالكي

بل اجزم انه بيرد عليها وبنشوفه كلنا ان شاء الله

====== فهد العتيبي ======

نبا نتقهوى على العز في محل القروم
ياحامد المالكي امورك اشلونها

احواركم له سنة ضاير وعيا يروم
نسمع هباب القصيد وهبهب الحونها

علم صديق الجماعة كان راعي لزوم
ما كل ضبعة تمجد قوة اسنونها

حنا على المذهب الاول ونهج السلوم
سحايب الشر لكّن الخير فـ مزونها

ولا ظنتي في مطانيخ القبايل رخوم
ولا كل ناقة حلوب الناس يشرونها

اكرمكم الله تقهوينا وجعلك تدوم
يوم الذبايح حلفنا ما تذكونها

--------------------------------------------------

رد الشاعر حامد المالكي

==== ردي الاخير ====

تبقى وربي محييني وليتك تقوم
ترقى سنام البعير إن شب غليونها

يالضابط اللي على بدلتك تاج ونجوم
من فرع خشمك تحيي من يديرونها

تحلم بعين الصقر لو واقعك سمع بوم
من شأن تسمع اوآمر ما يعيدونها

ارضخ لقائدك يالطيب وخلك خدوم
ليجردونك من اثيابك ويرمونها

مدام هذا الشنب كله على اربع ارقوم
ماهي بصعبة على دقنك يحلقونها

لكن يا شريم لا تنفخ وكلك هموم
ترى جنون البقر في رؤسها جنونها

ياهيه اصحى قبل تفرض عليك الرسوم
حتى بقركم من الحاجه تبيعونها

لو اني ادري بعد هذي ميهناك نوم
ياللي من الجهل لحيتكم تحسنونها

صورت فنجالك وتعزم عليه العموم
كمل وعطنا صور ناسن يصبونها