ترى الجبل ون طاح جاكم علوه

السلام عليكم

من بين الاوراق هذي مجاراه للشاعر الصريح

قال الصريح

..

وشيب عيني من صواديف الأقدار=حتى الصباح الزين ماشوف نوه
جتني طوابير الحزن والفرح طار=ياويل قلبن بالعنا ماتفوه
الحزن بعثرني وأنا كلي أضرار=والقلب مستسلم ولا فيه قوه
حطيت حزني فوق شيمات الأعذار=لابوك ياحزنن تعايشت جوه
الحزن يقطف ضحكتي قطف الأزهار=ويحطها بالنار وعيش ضوه
ضاعت ملامح فرحتي بين الأمرار=لو الفرح مخلوق جاني مشوه
أصبح مع الأوجاع والليل منهار=ون قلت ياحزن أنتهى قال توه
ماجيت أدور من عواقيبها ثار=واللي تبيه من الكدر قوم سوه
من ضيقتن بالصدر تكتبلي أشعار=ومن عزتن بالنفس وحلى مروه
جيتك أمرر جملتن بين الأقطار=ترى الجبل ون طاح جاكم علوه

وكانت مجاراتي له

الله على هجس المعاني ليا ثار=وأمسى يلج امع المعاليق دوه
انشهد اني في صدى الشعر محتار=اطروق شعر ٍ بالمعاني رهوه
منها الصريح ابدع لها الطرق وأختار=ما يربش التفكير ويزيد سوه
يشكي بها والوقت جاير ودوار = وانه غدى من جور وقته لهوه
يا صاحبي جيتك وأجاري بالأفكار=ما نختلف والوقت صابه عموه
يا عنك هذا الوقت في ميلته جار= قام يتعالى في جداه وسموه
والحزن بير ونارده دون الابيار = والواجب انا نتركه مع دلوه
لو قلت وان الحزن يهطل كالأمطار = ويغرق ضمير ٍ بالفرح له مخوه
افكار عقل ٍ ما بها غير الاخطار =اليا متى وقلوبنا في رخوووه
لكن نصية تجربه طول الاعمار = من واحد ذاق العنا من طروه
لا تنثني للوقت لو صار ما صار = دام الْ يمينك مع يسارك حموه

وسلامتكم


محبكم عبدالرحمن