عهدي بها قدام تلبس عبايه .. وانا بعد قبل ألبس شماغ وعقـال ..!

عهدي بها قدام تلبس عبايه
............وانا بعد قبل ألبس شماغ وعقـال

طفلين نتهجّـى حـروف الهجايـه
...........الله ياماجمل سواليـف الاطفـال

كانت لنا في كل شـارع حكايـه
...........وكنا نقول علوم ماهيـب تنقـال

وكنت اتقاسـم مامعاهـا معايـه
...........من(عسكريم) التوت للعلك ابوريال

وكانت بعكسي شاطره في القرايه
...........تقرأ جزء عـمّ وطـه والانفـال

وأنا لك الله من مـواري غبايـه
...........مدري ابو النقطه هو الـدال او ذال

وكانت لابويه تشتكي من شقايـه
...........وتعلّمه كيف اربط البـاب بحبـال

ياما على ظهري كسر من عصايه
...........يقول لي : خلّك وأنا ابـوك رجّـال

وامي تقول : ادع لولـدك الهدايـه
...........خوفي يصيبه كثرة الضرب بهبال

لاشفتها مـع اول الـدرب جايـه
...........مدري أنا اللي ملت ولاّ الوطا مال

احسّ قلبي يرتجف فـي حشايـه
...........ماكنّه الاّ الضيـف لاهـزّ فنجـال

ياما عن "السّحلي" تخبّـت ورايـه
...........لاخوفوها فيه ثـم شافـت ظـلال

تقول : خلّـك يا حبيبي معـايـه
...........واسّتأنس العب عندها دور الابطال

وآغار حتّى من عيـون اصدقايـه
...........لا طالعوها قلت : (( تكفـون ياعيـال))