لاتعطي سرك امرأة ولا تخاوي أمير

" لاتعطي سرك امرأة ولا تخاوي أمير "


فيه ولد سمع الحكمة هاذي من أبوه فكان يبغى يثبتها..المهم إنه راح وخاوى أمير
في ديرته وصار خويه الروح بالروح..
والأمير مايطيب له المجلس إلا أذا كان هالشاب فيه..صارنديمه بـ اختصار..
الأمير عنده مزرعة نعام وكانت عنده نعامة غالية
راح الولد وأخذ النعمة ودسها في مكان في المزرعة
وراح لسوق الغنم وشرا خروف وذبحه وقطعه وجابه في خيشة آخر الليل لأمه
وقال لها لحم نعامة الأمير يمه..
جايبه لك يالغالية..بس تكفين لاتعلمين أحد..
عشان لو درى أحد بيوصل الكلام للأمير ويقطع رأسي
الأم قالت:ولايهمك ياولدي..مجنونة أنا أفضح سرك واموتك بيدي..؟!
من اليوم الثاني عزمت أمه جارتهم على اللحم..وسألتها وش هذا اللحم الزين يافلانة..؟!
قالت الأم أقولك بس سري في بير..؟!
ردت الجاره سرك في بير ياوخيتي افا عليك..
قالت الأم لجارتها السالفة وحلفتها ماتقول لأحد عشان ماينذبح ولدها
طبعاً الأم يوم علمت الجارة كان قصدها مفاخرة بولدها..
يوم بعد يوم السالفة انتشرت بين الحريم في الديرة
ووصلت للرجال وفي الأخير وصلت للأمير اللي عصب
وطلب من الحرس إنهم يجيبون الولد ويحطونه في السجن لين يجي يوم ويقيمون عليه الحد
الولد طلب من الحارس إنه يروح للأمير ويقول له أن النعامة للحين موجوده في مزرعته
بس خاشها في حوش بعيد عن باقي النعام وإنها بخير..
الأمير طلع الولد واعتذر منه وحاول يعوضه بس الولد رفض وقال أبوي صدق في حكمته
وهاذي بس نعامة أجل لو كانت شيء أكبر من كذا
وش كان بيصير فيني..!!