من لا يقول الحق في وجه ظالم

السلام عليكم اعضاء الصرح النايف ومتواضعه ترجي القبول

من لا يقول الحق في وجه ظالم=ظلمت وجه الحق لا انعد رجّال
واللي بِقول الحق تلقاه والم=رجّال لكن حق عن عشرة ارجال
الحر سيف لشفرة الظلم ثالم=عونٍ مع العدل وعلى الظلم سلّال
واللي يتاجر في هموم المظالم=برماح دعوات المظاليم ينطال
ومن لا يجيب العلم من راس عالم=قهواه من دلّة هل الجهل فنجال
لا يفتكر بانّه من الجهل سالم=ساحب ذيول الجهل من روس جهّال
والغدر لقلوب المشاكيل كالم=والجرح كنّه غيم بالغبن همّال
الشهْم ويّا الغدر ما ينتوالم= الا إذا أَمّ المصلّين تمثال
لو ما انغدر بكليب ماثار سالم=ولا ينكتب بالدم لا اتصالح انذال
واللي على العيلات دايم مسالم=داس السّطر وانداس باقدام عيّال
يسامح بثنتين شيمه وإذا لم=يبين فضله فيهم ايثور ريبال
والطيب طود اسمه فريد المعالم=بعيون هامات المراجل له اجلال
واللي بدون افعال يرقاه حالم=لازم فعول اصدق من فعول زلزال
فعايلٍ من كل عيبٍ سوالم=ما كنّها الا ديمه امطارها انفال
منها الصحارا الجدْب تحيا عوالم=وارمالها تلبس من الخير سلسال
حينه يكون الطيب شكْل السلالم=يرقى بفعله فوق راسه ويختال
ورجلٍ بدون افعال للنفس ظالم=ولطمت وجه الحق لا قلت رجّال

بدر ناصر المورقي