معشي الذيب ..؟

الجرح ياهل العرف زاد التهابه = غاير صوابه ما نفع فيه تطبيب
لا واذهاب الفكر لا واذهابه =محتار في قوم غدى فعلها مريب
ياقع على الهين سوات الذبابه = مردي ولا تنفع معه قولة معيب
هذا زمان الهون فيه الزلابه = زيزوم مجلاسه مع الشمخ النيب
ما عاد لك ياذيب قدر ومهابه=ولى زمان الذيب ومعشي الذيب
لا يا وجودي يا زمان النهابه = يوم الرجال تّعد بالجود والطيب
قوم القرى واهل النقا والطلابه= ارجال ماتجهل ولافعلها مخيب
خندف تنادي ربعها من شبابه=قوم عليها تبدي الشمس وتغيب
والذيب يعوي ينتخي بالذيابه = لعلها تسمع صدى الصوت وتجيب
قدام لا فكري تجيه الكأبه = وسواد راسي يكتسي عقبها الشيب
والذيب يرجع للقطو والكلابه = فصايله لا شك في قولي مصيب