والله لا غني بالهجيني وانا عيد

14-10-2018, 09:17 PM

‏

والله لا غني بالهجيني وانا عيد=وان كان ماغنيت به خطروني
فنجال بنن من كفوف الاواليد=اشقر عليه من العماني فنوني
وتحرم علي الجايده من نماء الغيد=وحليب حنزابٍ بسوطن حنوني
على الحوار مقيده ما بها قيد=فيها عليه ريام مثل الجنوني
وعلي تحرم عندل البيض والصيد=ويحرم عليّه شوف رنق الوجوني
نجل العيون اللي بها سحر ياعبيد=وعواتقٍ تزهى خفي الشجوني
لو شافهن عودٍ يسوق المعاويد=فز وتذكر ناعمات الغضوني
يذكر زمانٍ فات مع صافي الجيد=مع جادلٍ من طبعها ماتخوني
ما دوجت بالسوق مع كل عربيد=ولا هاتفت شخصٍ من الناس دوني
جاوبه احلا من عذي القراهيد=سكر نباتٍ في حليب البوني
ولوشافها شيخ القضاء جاك بالعيد=صابه دواكيكن وهم وشجوني
الردف شط اللي تسن المفاريد=غيطل لها الحادي رموز اللحوني
حايل ثمان سنين عند الاجاويد=شقحٍ سنادٍ ما يجيها الزبوني
عنها يعدون الرجالٍ الصناديد=من دونها وقت الوغى يجهلوني
بحدب السيوف الصارمات البواليد=تفصل عن الراس العنيد المتوني

عيد بجاد بن شده

عبدالله الصقري ,ريم الفلا ,رحيل و 3 آخرون معجبون بهذا

14-10-2018, 09:40 PM

يذكر زمانٍ فات مع صافي الجيد
مع جادلٍ من طبعها ماتخوني

ما دوجت بالسوق مع كل عربيد
ولا هاتفت شخصٍ من الناس دوني
.
صح لسانك ولا هنت شاعرنا
نص راقي برقيك يعطيك العافية