خبر يخليك تلهد على فيل الزنتان ::

Alfars Allibi

خبر يخليك تلهد على فيل الزنتان ::
سكاي نيوز :: الرئيس الأميركي باراك أوباما يقول إن الانتخابات الرئاسية في سوريا "ليست شرعية"
.......
تعليق عقاب الليل ::

باهي يابوعمامة جيب ودنك جاي واسمعنى كويس . توة يامعتوه واجعك غير الأسد . تعالى شوف جماعتك مدايرين العار في الريكسوس . وشوف الشرعية على اوصولها . البرلمان تموا مدتهم وكل واحد جاب فراش في القاعة وحلفوا باليمين ماهم طالعين . ومددوا سبعة شهور قابلة للتمديد مدى الحياة . وقالوا لأننا قمنا بأنجازات عظيمة تتطلب بقائنا . وهما قال الاسطى ناكر مابنوا حتى وردة . والسخسية بوكا يجيب الاربعطاش ونص ويهد من جهة الزازيرة على المؤتمر وقاللهم اللي مش عاجبه بنكره لدار خالته . وزيدان في ليلة من غير قمر قالوله تم أسقاطك ولحقوله الشنطة وكندرته في المطار . ولعند توة يقول انا الرئيس الشرعي ويصدر في القرارات من المانيا بالسكاي والفيسبوك . وعمك بوسهمين شده التاجوري في فشلوم . طبعا تعرفها يابوعمامة اكثر من نيويورك . كيف هاديكا اللي قلت قصفها الطاغية بالطيران وخلاها رماد كلها الا حوش بوسهمين . وأنت شاهد لما الألاف ماتوا في الشوارع وجاك شلقم والدباشي يبكوا بدموعهم . وكثر خيرك واسيتهم ووقفت معاهم في الغربة وهما ماعندهم حد . المهم عمك بوسهمين بعد هاديكا العملة ياخد شنطته ويعطيها لتركيا هو وحنين . وماتسأل منى المفعوصة حنين لأنها طلعت هيا رئيسة البرلمان المخفية ومايعرف حد . حتى انت ماتدري عليها . شفت الخطة الامنية . راهو ليبيين مقطرين مش لعب . وبعدها عمك الثني جابوه يومين مافرحش بالكرسي لين داروله لعبة القط والفار . وجي الحرامي السويحلي وعلى الهواء مباشرة خلى الجماعة طلعوا من القاعة ونقز شطب على العدد اللي صوت ودفه 121 وسكها زغروته قاللهم وليد أختى بدا الرئيس . والثني حلف بالطلاق ماهو مسلم الرئاسة ويصدر في القرارات من المهاري . والوليد معيتيق يدور في جماعة فندق توباكتس بيدير منهم حكومة ويصدر في القرارات من توباكتس . والدنيا ماشية والشعب ادروش معادش فهم منو الشرعية ومنو الرئيس ووين الحكومة . من الاخير يابوعمامة ألحق المفرخ متاعك راهم داروا العار . واخطى بشار راهو واعر عليك وبوتين مايلعب . راهو غير بتاخذه مقلب زي جزيرة القرم وماتلقي بعدها باش ترقعها . هي بالسلامة ... الفـــــــــــــارس

انا استغرب سيدتي
ان يتحول موقع ادبي الى اخبار شخصيه
اقدر حبك واقدر وطنيتك واقدر كل مايدور بفكرك من اشتغراب الانحطاط العربي والكن
الخط الواحد ممل تقديري لك

ولا العن من اوباما الا بشار قاتل السوريين فصيلتهم واحده

ينقل الى قسم الاخباريه