عهود الصداقة

لا شك في نفسي من الوقت ساموح =ولا شك في نفسي عتب واحتراقه
أسير الهاجس طواريق وامزوح= واسير المعنى بفن ولباقه
حق الخوي واجب أساويه بالروح= أحفظ له حقوقه وحسن العلاقه
أدمح له الزله واقول مسموح =وارعى عهود المعرفه والصداقه
درب الجماله ما يبي هرج واشروح =يبي عزوم ارجال تعشق نطاقه
ولا المقفي مالنا فيه مصلوح =طرد المقفي من سلوم الحماقه
ماني على شرواه بمكثر النوح =ولاني على شرواه راعي شفاقه
من يتبعه محصولها حفنة جروح= ويصبح على ما قيل راعي طفاقه
كلٍ بوقته له تفاكير واطموح =وانا هوى نفسي من الطيب باقه
يقوله اللي خيل بروقٍ تلوح =ورعادها دندن وفيه إصطفاقه
تلوفها ريح الهبايب على شفوح= تسوقها من غير كيف ورواقه
القاع منها صار ما كن به ضوح =وغديت مثل اللي كسِر عظم ساقه
يخشى عواقبها ويخشى على صروح= وبيت الوفاء ينهار كامل رواقه
وقبل الختام وقبل ما سري يبوح= اهدي التحايا الوافيه للرفاقه