نور القمر

صوتي وصدى ابو صلاح
︶︶︶︶︶︶︶︶
‏

بسم الذي حلل وحرم وارخص بشيٍ مباح=جل وعلا يامر وينهى حيثه بخلقه عليم
نور القمر ساطع وسامرته ايلين النور باح=الف سيم لهالبيوت الكايفه وافل سيم
بالهجس رغبه للشعر بالصدر فسحه وانشراح=مثل انشراح صدور من راحو يشمون النسيم
وكل السبب علمٍ لفاني منه ريح الطيب فاح= وحبيت اشارك به وابارك وادعي الرب الكريم
يجعل سعادة ما استجد اتعوضه في حزن راح=وخط التوافق بينهم يصير عدل ويستقيم
غيثٍ عليكم لا رعد دندن ولا براق لاح=ولاهي غريبه لا حدود لقدرةالرب العظيم
هو ناشكم شختور من وبل المطر يابو صلاح=والا على الشمروخ والفيحان هتانه وديم
دريت بعسوس العرب من قبل وازمعت المراح=لكن غط العلم عن من خايله لو شاف غيم
العود قبل اسبوع له كم ليل ما ذاق المراح=وانا ما الوم ابو بدر ياهجر من ماله نديم
لكن عسى عمره طويل وضيق صدره بانشراح=ونبت الفجوج يبين له منتوج والمقصد سليم

『✦وهذا رد ابو صلاح عبد الله بن علي السيحاني✦』

‏

يامرحبا ترحيبةٍ تبري مغاليل الجراح= برسالةٍ جتني وانا ساري على خط القصيم
رسالة فيها النقاوه والتشره والمزاح=وفرايزٍ مثل الذهب ميقاعهن بالصميم
ياخذ عليه صاحبي بين المعاتب والمزاح=وانا عن النشاد والشداد والطرقي مقيم
اسج واسهج واتسلا لين يلدن اللقاح=هذاه كان ابعيرنا الماخوذ ماهوب ابعقيم
يابو عبيد رسالةٍ جت منك اقلدها وشاح=واحطها تاجٍ على راسي وراعيها حشيم
لكن انا ضميان والديره مواردها شحاح=وانته خبير وتعرف احوال البشر ما انته غشيم
دايم سحاب الصيف معه الريح مهجاد وصباح=مضرب مثل للبدو والعراف من وقتٍ قديم
لكن عسى رحلة ولد مسلم يحالفها النجاح=وعسى الرخا والامن والايمان دايم مستديم
واسمح وسامحني يابن عمي وعادتك السماح=عسى عظام عوادةٍ جابوك ما تجي الجحيم
انته حزامي عن صدوف الوقت مشدود الشباح=هذا كلام الصدق فالحاضر وفالوقت القديم

ريم الفلا ,ملكة الرواسي ,عبدالله الصقري و 1 آخرون معجبون بهذا

رحيل

الله الله
ناصر الهواوي
صح لسانك مليون يالجزل
مبدع وشهادتي فيك مجروحه
وصح لسان عبدالله السيحاني
مبدعين وجزلين الله لايظركم
مروري وتقديري
يسبقه ختمي
وتقييمي

عبدالله الصقري ,ناصر الهواوي معجبون بهذا

الله الله
صح لسانك حتى ترضى شاعرنا
وصح لسان عبدالله السيحاني
ولله دركم
والإبداع من اهله ما يستغرب

عبدالله الصقري ,ناصر الهواوي معجبون بهذا

صح لسانك مليون شاعرنا
يعطيك العافية ولا هنت

أبدعتوا شاعرنا صح لسانك على الصوت الرائع
وصح لسان الشاعر عبدالله على الصدى ولاهنتوا

صح لسانك ملاييين
مبدع وجزل شاعرنا القدير
يعطيك العافيه