العام جانا ذلولٍ

هاذي القصيده لها سالفه : و القصيده اللي لها مناسبه ما تصلح ولا يفهمها المتلقي الا اذا عرف مناسبتها : ومناسبة هذه القصيده
سويت قصيده قبل القصيده هاذي .امزح بها على واحد من الربع توفى الله يرحمه ..وفيه واحد يقاله (فرحان العتيبي الله يذكره بالخير )صحيب لهذا اللي انا امزح عليه بالقصيده . وفيه بينهم موضوع يتنافسونه عليه .وسويت القصيده امزح بها على اللي من الجماعه أقوله فيها اني بخرب عليك الموضوع ,وذكرت فرحان فالقصيده علشانه المانافس اللدود له في هذا الموضوع بدون ما أوجه القصيده له ,.مع اني ما اعرف فرحان شخصياً ولا قد قابلته الى الآن .معرفتي له من خلال قصايده اللي اسمعها عنه وهو كذالك مايعرفني الا من خلال قصايدي اللي يسمعها مع الناس ..المهم وصلت القصيده لفرحان عن طريق صاحبه .. ويوم دريت لاهو مرسل لي مرسول . يقول خل فلان يعلمك بطلبه اللي يبيه مني قليل والاكثير ويعتبره مقضي ...قلت للمرسول لاجيت فرحان سلم لي عليه .وقل يقول فلان بيض الله وجهك وصل جميلك والله لايهينك . .وفزعته يعتبرها وصلت ..وانا ما ابي الا سلامته ولاني محتاج لاكثير ولا قليل ولا ناقصنيي أي شيء .والسالفه كلها مغار مزح .الله يكثر خيره ويجمل حاله ويجعله ذخر ولاخلا ولا عدم .وراح المرسول من عندي وعلمه بكلامي وبعد مده ولا جايني واحد يقاله هادي يقول انا مرسلني فرحان يابا القصيده قلت شف يا هادي ان كان فرحان مرسلك صدق يبا القصيده غالي والطلب رخيض وهاذي القصيده وكانه ما ارسلك . القصيده ماهي موجه له .انا شملته فالقصيده وذكرته فيها ولاكن القصيده ماهي موجه له ..قال الا مرسلني قلت مادامه مرسلك هاذي القصيده المهم اخذ القصيده و راح من عندي وبعد مده ولا جايني واحد بحوالي خمس ابيات يقول هاذي ابيات من قصيده رادن ابها فرحان على قصيدتك ..وانا بصراحه شكيت انها مسواه على لسان فرحان لانها تناقض مع كلامه اللي جاني به مرسوله .وانتظرت مده يجي رد والا علم من فرحان يوضح لي الابيات اللي جتني هي له والا لا ماجاني شيء من فرحان .وارسلت هذه القصيده لفرحان اعلمه باللي حصل واستفسر منه عن الابيات اللي جتني .هي صحيح له والا ,,طبعا القصيده هاذي ماهي على قافية قصيدتي الاوله .ولاهي رد على الابيات اللي جتني ( قصيده مباريه للاستفسار عن الابيات اللي جتني هي له والا لا).(وفالاخير تبت ان الابيات اللي جتني لقرحان و رديت علاها ) سوف نوافيكم بالقصايد الثلاث لاحقاً
القصيده أقول فيها

الــــــعـــــــام جــــــانـــــــا ذلـــــــــــــولٍ فــــوقــــهـــــا هــــــــــــــادي=مــــرخـــــن رســـنـــهــــا وتـــاركـــهــــا عـــــلـــــى يـــــدهـــــا
كــــن يـحــداهــا عــلـــى قــطـــع الـســكــك حـــــادي=لـــــــــو فــــيـــــه مــــوتـــــر مـــــــــع الـــســـكّــــه تــهــبــّـدهـــا
يـــقـــول انــــــا مـــــــن طـــــــرف فـــرحــــان نـــشــــادي=عــــــــــــــــن الــــقــــصــــيــــده يـــــبـــــاهــــــا ويــــتــــوجّــــدهـــــا
قــلــنــا الـعـتـيـبــي عـــزيـــز و وراعـــــــي شـــــــدادي=والــيـــا طـلـبـهــا ابـــــرك الـســاعــات و اسـعــدهــا
ان رد لا نــــمــــنـــــعـــــه والــــــســــــلْـــــــم مــــــنــــــقـــــــادي=ولامــطــالــبـــيـــنـــه بــــــــــــــــرد انــــــــكــــــــان جـــــمّـــــدهــــــا
مــــــــــــدام هــــــــــــو بـــالـــعـــلـــوم الـــطـــيـــبــــه بـــــــــــــادي=مــــــــــــن قــــــــــــدّم الـــطـــيـــبـــه لــــلــــنـــــاس يــــاجــــدهـــــا
واخــــــــــــذ طـــلـــبـــكــــم وراح الــــــكـــــــم ولاعـــــــــــــادي=عــــقّـــــل ايـــــداهـــــا عـــــقـــــب جــــــــــاك وتـــوســـدهــــا
وجــــــانــــــا عــــــلـــــــومٍ بـــعـــضـــهــــا حـــــــــــــادرٍ وادي=مـــــــاجــــــــاء ردٍ نـــــفـــــاهـــــا الــــــــنــــــــا ولا أكّــــــــدهــــــــا
لــقــحــت بـــكـــره لاكـــــــن الـــوقــــت مـــــــا جـــــــادي=مــــــاتـــــــت بـــــــطـــــــن امـــــــهـــــــا قــــــــــــــدام تــــآلـــــدهـــــا
والله لا أبرّي ولا اتــــهــــم ولــــــــد الاجــــــــوادي=والــــنـــــاس عـــــــــن كـــــــــل شــــــــــيءٍ مــاتــبــاعــدهــا
الــنـــاس فـيــهــا اصــدقـــاء واعــــــداء وحـــســـادي=ولا ادري عن أبيض قلوب الناس وأسودها
خـــــاف احــــــدٍ جـــالـــسٍ فــالــريــع مــــــن غــــــادي=والـــيـــا جـــتـــه مــــــن طــــــرف فـــرحـــان جـــوّدهــــا
وغـــيّــــر مـــســــار الــعــلـــوم وســيـــرهـــا الــــعــــادي=اســــــــــــواه نــــــقّــــــص بــــــهــــــا وأســـــــــــــواه زوّدهـــــــــــــا
ســمــعـــت لـــــــي مـــنــــك عـــلــــمٍ جـــابــــه الـــــــرادي=قــــــــــــوّم عــــــلــــــى راســـــــــــــي الــــدنــــيـــــا وقــــعّــــدهـــــا
وراك ســــــويــــــت مــــــثـــــــل اعـــــــــــــلام بــــــغـــــــدادي=نـــــــــوبٍ تــــذيـــــع الـــعـــلــــوم ونــــــــــوب تــجــحـــدهـــا
اصــــحـــــى يــضــيّــعـــك عــــلـــــمٍ بــــايـــــهٍ غــــــــــادي=أصْــــــبـــــــح كــــثــــيـــــر الـــــــرجـــــــال ولا تـــنـــشّــــدهــــا
وانــــــــــــا بــــخــــيـــــصٍ بــــمــــصـــــداري ومــــــيـــــــرادي=بــــعــــض الــــمــــوارد لا أصــــدرهـــــا ولا آردهـــــــــا
مـــالــــي مــــــــع ابــالـــخـــلا مــجـــلـــس ومــقـــعـــادي=مــــســــعــــودهـــــا واســـعـــدالـــلـــتـــهـــا ومــــســــعـــــدهـــــا
انـــــــــا عــتــيــبـــي عــــريـــــب مــــعـــــرّب اجــــــــــدادي=آقـــــــــــــــــف بــمـــيـــقـــافـــهـــا واقــــــــعـــــــــد بـــمـــقـــعــــدهــــا
والــلـــي خــلـــق مـــــا تـمـالـحـنـي عــلـــى الــــــزادي=أبــالـــخـــلا الــــلـــــي حــجــلــهـــا يــــركـــــب أربــــدهـــــا
كــــــــــــوّع عــــــلــــــى دلـــــــــــــةٍ صــــــفـــــــراء وبـــــــــــــرادي=لاتــنـــفـــخ الــجـــمـــره الــــلـــــي جـــــــــوف مـــوقـــدهـــا
الا انــــــــك انــــســــان ودك حـــــــــرب وجــــهـــــادي=هـــــذا الــرســـن فـــــي يـديــك اليوم واقــتــدهــا

عايض العتيبي

ملاحظه
طبعاً من البيت الـ 14 وبعد فالقصيده انا بنيتها على معني ابيات فرحان اللي جتني .يعني مارايح تتضح لكم الصوره مضبوط هههههه
لين تسمعون قصيدتي الأولى ورد فرحان علاها وردي على فرحان الله يذكره بالخير

صح لسانك شاعر جزل وصح لسان الشاعر فرحان مقدما
استمتعت بالقصه والقصيده واكييد ماعنزت الا على رجل ونعم
لانسا توافينا باقصيده اللي ارسلتها على الرواسي

صح السانك ي ملك الشعر والقافيه
سلمت ولاهنت .."

صح لسانك ي ابوجزاء
ولاجديد الا الابداااع والابداااع لايستغرب على اهله
تحياااااتي الك

اقتباس:

المشاركة الأصلية كتبت بواسطة الصارم

صح لسانك شاعر جزل وصح لسان الشاعر فرحان مقدما
استمتعت بالقصه والقصيده واكييد ماعنزت الا على رجل ونعم
لانسا توافينا باقصيده اللي ارسلتها على الرواسي

صح بدنك يالصارم باسمي ونيابةٍ عن أبو عزيز مقدماً وماعلاك زود طال عمرك ,
الله يمتعك بالصحه والعافيه . مايبي لها كلام ونعم بابو عزيز مافيه قصور
ابشر انشاء الله فالايام القادمه بنعطيكم القصيده ورد فرحان عليها وردي عليه
شاكراً ومقدراً لك مرورك المشرف وكلامك الطيب لاهنت
تحياتي وتقديري لك

الله الله صح بوحك ي عايض
ابيات رائعه وجزله سلمت ولاهنت
يعطيك ربي العافيه.

صح الله لسانك ملايين ياعايض
ولاهنت ع القصه والقصيده
دمت ودام ابداعك ورقي حرفك الشامخ
تقديري لسموك
النجلاء

صح لسانك وبيض الله وجهك على القصه والقصيده الجزله

تقبل احترامي واعجابي.