مجاراه رباعيه جديده

السلام عليكم ورحمة الله وبركاته

مجاراه رباعيه

اتمنى تروق لذوائق الاعضاء الكرام والزوار الاعزاء
_______________

عبدالله بن طلال - الناقد عبدالله الروقي - الشقاوي سلطان الغبيوي - ابو عبيد ناصر الهواوي

الصوت من عبدالله بن طلال :

يالنـاقـد الشغـمـوم مسّـيـك بالـخـيـر=تـحــيّــةٍ مـعــهــا خــبـــر واســتــشــاره
العـود عانـه عـقّـب (ام المناشـيـر)=راح ل(نـفـي) مـعـزوم مــدري زيـــاره
عـنّـا المويـتـر كــل يوميـنـه امـغـيـر=مـاعــاد يـقـعــد فــــي مــرابــع ديــــاره
والمزرعه معذر بهـا الوقـت الاخيـر=وامـهـمــلٍ شـبـكــه تــطــارب جــفــاره
ماعـاد فيهـا غيـر حبحـر وجرجـيـر=مـات الطمـاط ومـا بقـى لــو خـيـاره
اثر الهـوى يثّـر علـى الرجـل تأثيـر=ويـرمـيــه فــــي بــحــرٍ بـعـيــدٍ قـــــراره
وان طعت شوري ياسليل المناعير=رح لـه ووضّـح لـه صـريـح العـبـاره
قل له يجوز من العنى والمخاسير=وش فــايــدة مــــادام فــاتــه قــطـــاره
وانته بخيـص وناقـد وتعمـل الخيـر=وتــرى النصيـحـه مـاوراهــا خـســاره

الصدى الاول من الناقد :

عَدَاد ماغنت طيور العصافير =يامرحبا والقاف شبيت ناره
شاعر يابو مشعل ولافيك تقصير = لو القصيد بْعِير قسْمك فقاره
العَود روَّح مع دروب الغنادير = على نجوم الليل يرسم مساره
ياما نهيته عن كثير المشاوير = قال العنا لاهنت لعيون ساره
الجادل اللي تل قلبي كما السير = تلةْ غشيمٍ قاطعٍ له إشاره
وأظن مايقبَل لها الوضع تغيير = ومويتره ماظن يركد غباره
مادام من مخباه دفع الفواتير = ماتنفعه كثر الحِيَل والنعاره
لو طاعني يشري نياقٍ مغاتير = يرعى بها زملوق راس الزباره
ماله ومال الحب صفوِه غثابير = ياتيه من يم الزمان استداره

الصدى الثاني من الشقاوي :

اصحابنا اللي عايروا بالمناظير=وحطّوا لهم عود السياحين اشاره
خلهم يزودون الرمي لينه يحير=ويرجع على عقله يراجع قراره
اتعب ركابه والحصيل المخاسير=نوبٍ على ديرة ونوبٍ لحاره
مرٍ مسانيدٍ ومرٍ محادير=وليا نشدته قال اسوي زياره
ياعود لو سقت الذهب بالقناطير=منته بلاقي من يسوق البشاره
لو تصبغ اللحية ولو تدهن السير=الشاص حايص لو حبكت الغمارة
ولو تفحص الموتر وتنجح بتقرير=وتدبّس التقرير فالاستماره
ما احدٍ بشاري لا بهذي ولا غير=دام المديل اقفى وقِفل ستاره
وانا ترى ما احسدك لكني اشير=ماودي انك تنتهي بالخسارة

الصدى الثالث والدفاع عن النفس من ابو عبيد والله ماينلام لأننا كلنا ضدّه هههه :

ناقد ومستفسر وزرّاي وامشير=بالربع شكه في صريح العباره
كلٍ تقلد سيفه وجاني امغير=على الظلايم بالجماعه جساره
زعيم صمد اقمح بدا نقرة الزير=وكلٍ من الاثنين قرقع بطاره
ما اهتم لو كل الثلاثه هوامير=شعر وتهكم وافتزاز وشطاره
لكنهم طاحوا على قمة النير=طول وسعة حيِّز وقوة حجاره
تكسروا فوقه سواة القوارير=وهذي نهاية كل من فيه باره
وشبيت وادنيت الدلال المباهير=ونويت احذف لكل واحد شراره
الله على اللي لا اشتغل وادرج السير=كن كمرة البوينق شكل الغماره
ابي عليه ليا طرا طاري اعصير=ولي موعدٍ من قبل طال انتظاره
وزهمت اجيك؟وقال يالله عسى خير=وادرت زر مكيفه للحراره
وحرك بعد غابت وشب الفنانير=كنه عقابٍ شايفٍ له اوباره
وجهه جنوبي ما يبي وجهةٍ غير=لو نام سواقه نصا الجمس داره
يبي وليفٍ للبني شيخ وامير=لو شافه الناقد ليا اطلق زراره
النقد ضاع وحوَّل النحو تعبير=والحلو عنده صار بفمه مراره
وسلطان لو شاف العذاب النواوير=(ياويح قلبي منه) صارت شعاره
وابو طلال ان شاف زين التصاوير=خدٍ وقد ورمش عين ونظاره
واوحى كلامٍ مثل نقد الدنانير=لوقلت.ما اسمك؟؟قال عزمي بشاره

وسلامتكم

وأنت سالم وغانم يابو مشعل
مجارآه أكثر من رائعه
صح الله لسانك يابو مشعل
وصح الله لسان الشاعر الناقد عبد الله الروقي
وصح الله لسان الشاعر سلطان الغبيوي
وصح الله لسان شاعرنا ابو عبيد
وبيض الله وجهك ع الايراد الجميل
تقديري لك
النجلاء

عبدالله بن طلال

يعطيك العافيه على الطرح الراقي
نسمات معطره وجدتها بين زهور احرفك الجميله
محملة بعبق انفاسك وعطر احساسك و شذى طرحك
نسجت من خيوط الحروف بركان من المعان
هزت كل بحور المعاني و روت شواطئ الانهار
هكذا هي تنهات ينابع من ماء الورد تسقي ارواحنا
كان لحرفك اثر كبير وصدا رائع
ارفع لك سيف الشموخ ياشامخ
لله درك يابن طلال
ونعم الرجل ونعم الشعر الجزل
بدايه رائعه منك
ومجاراه رائعه من الشعار الكرام
باقة من الجوري لروحك النقيه

ههههههههههههههههههههههههه
ناقد ومستفسر وزراي ومشير
بالربع شكه في صريح العباره


منهو الزراي منكم ههههههههه
صحت السنتكم جميعاً
والله انكم ابدعتو ولو انكم ملتو على ابو عبيد شوي
جزلين يالاربعه الله لايظركم
دمتو بخير وصحه وعافيه

ماشاء الله ابداع في ابداع
مجاراه جميله جدا
صح السنتكم
بانتظار ابداعاتكم القادمه
تقديري وتحياتي

مجاراه رباعيه ولا اجمل منها

؛

دامت عشرتكم على والوفاء والمعزّه ودمتم بخير وسعاده

؛

لكم مني اجمل التحايا والتقدير

صح لسانكتم

طرح راائع ومجاره جميلة جدا
لاحرمنا جديدك المميز

ماهي غريبه الجزاله
من بحور الشعر صحة السنتكم جميع
ابدعتو والشكر يابو مشعل على النقل المميز

امتعتنا