الحياه دروبها عسرات والتوفيق صدفه=والبخت نطّحته الهقوات والمسرا طويل
اتحزم بالأمل طول المسير المُر وأسفه=كل وسواسٍ يراودني عن الحلم المهيل
خاطري عطشان وصل وبي من الأقدار رجفه=والطريق اللي سلكته موحش نهارٍ وليل
والموارد بعضها ما تسقي الظميان رشفه=لو يموت من الظمأ والماء قراحٍ سلسبيل
والزمن يمضي وعمري راح ف الأوهام نصفه=أتمنى والمنى للنفس ما تشفي غليل
لي على حظي حقوق ومنه ما عينت وقفه=طول عمري ما اذكر ان الحظ سوا لي جميل
إمتردي يوم أنا من صلب شيخانٍ وترفه=ما امتدح ذاتي لكن الحق هذا بالدليل
الله يجازيك يا وردٍ بعدما ما حان قطفه=ما لحقت اقطف لنفسي منك لو شيٍ قليل
في خفوقي جرح دامي ما يوقف يوم نزفه=ما يجيه من الشفاء والراحه إلا بَخس كيل
يالله بحظٍ يشوف معَ هموم البال صرفه=وأستريح من العناء واودع الشعر الجزيل
ما حدا نفسي عليه إلا الشقاء وايام صلفه=لا سقى ذيك الليالي من مزون الغيث سيل