البارحه وأسمع قصيد المغنين=اللي على الجوال بان إنتشاره
أبيات شعر ٍ رددوها المساكين=من شاعر ٍ فوقه تطاير غباره
ينظم على طرق اللحين للموالين=وهذا على عوده وهذا بطاره
ليته نظم قافه رموز وعناوين=وأمبين أسمه كان فيها شطاره
لكن ْ تعالي يالمعاني وهالحين=الوضع حامي ما يبْ الإستشاره
جات القوافي تـطـّـبخ بالشرايين=والقلب زود تحتهن الحراره
فوح الضماير ما يبرد على هوين=يما ثبوت الفعل وألا دماره
تعال يا وجه الردى متجه وين=يا مغنين بالقاف لأجل الإثاره
ظلمت قومن فعلهم بالميادين=يشهد لهم تاريخ نجد إبجداره
قوم ٍ على الطاله كعام المعادين=والمعجزات إثبات فعل ونداره
قوم ٍ لنا بالوقت بيرق شجيعين=لأنته ولا غيرك يلوث شعاره
أقولها منطق وفعل ٍ وتدوين=ما هو كلام ضعيف خلف الستاره
حنا عيال مطير حنا هل الدين=وحنا رجال العز وأهل الصداره
وحنا هل الوقفات يوم الأكاوين=تدري وغيرك داري ٍ عن دياره
لا ثارت الهيجا فجرنا البراكين=نارد على حوض المنايا سطاره
أصغر شبل فينا يدك الضلاعين=وأكبر حكيم مطير منه الإشاره
وألا انت ويش انته مع اللي وفيين=مثلك يدوب إنه يقود حماره
وأكرمكم الله يالرجال العزيزين=عن كلمتي لكنّ لأجل إحتقاره
خبل ٍ تولج وأنطلق حول بابين=ما يدري إنه غاشم ٍ بإنحداره
يبذخ لسانه دون منطق وتثمين=يا للعجب وش دافعه وإنفجاره
هو يحسب إنه غانم ٍ نظم بيتين=يومه يردد بين تاره وتاره
الهرج ما حرر كثيره فلسطين=والفعل يبطي ما خذ الشين ثاره
والرجل لا منه خطى للقوانين=ما عاد تشعق بالمواقف ناره
اليا نطق بالهرج وسط الدواوين=تحسب عليه بكل صده وغاره
مي بركه دمحت ثلاث ٍ وثنتين=وحده هي اللي تلحقه بإنعثاره
والرجل لا منه تولج على الشين=ماله مع الأجواد عز اوقاره
مي مثل اللابه ولا أقول قولين=دوبه يمثل حالته بإعتباره
قلته وابن مطير فعل وبراهين=ما نتبع الخايب عسا بإنثباره
قوم ٍ لنا منهج ومبدا وتقنين=باللي لنا واللي علينا قراره
أفعولنا تذكر من أدهور وأسنين=وفعل القبايل شامخ ٍ كالمناره
وكل القبايل بالمواقف سديدين=والظلم شين ولا نقرّب جواره
ما يجحد أفعول الرجال الميامين=الا الضعيف إليا أختلف عن مساره
تم الكلام وقافي العلم حرفين=عسا لها في وسط قلبك شراره
لتعنّي إركابك هقاوي وتوهين=وأختر يمين الضلع والا يساره
مالك ومال النجم خلك على الطين=وأترك طويل الهرج واترك قصاره