عفت الهوى ومقابل الكيف والنار= وهرج العواذل زوّد الطين بله
شكواي لله قبل ما ابدي بالاشعار = وإن كانت الشكوى لغيره مذله
قلت اسند الطاروق للصاحب البار= اللي على اصحابه سحابة مطله
عنيت للروقي و بيحت الاسرار= ياعل في شوره دوى كل عله
أن قال هات العلم غديت محتار= عيا لساني وانعقد في محله
لكن يكفيك لو دٍرت الانظار= العين تشرح لك عن الحال كله
مثلك عريب الجد من نسل الاحرار= يعرف فنون الحرب في كل مله
تعرف سهام العين لا جتك باصرار= تاطا القلوب برمشها اللي تسله
وش حيلة المجروح وش حالة الدار= يوم الغضي قفى وانا في محله
كانك تعرف الطب لو عند عطار = تكفي قليبي نبهه ثم دله