شبكة رواسي نجد الأدبية - عرض مشاركة واحدة

22-07-2024, 11:49 PM

اقتباس:

المشاركة الأصلية كتبت بواسطة ناصر الهواوي

ارحبي يالجوهره ودام حضورك وصح بدنتس ودمتي وسلمتي من كل مكروه
ما ادري احس ان السجن يقول ابي نزيل يونس الشاويش خيال مطير اللي ما عاد
لد بنا بشق عين هههههههههه وقلت
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــ
كان جيبك يشتغل دق سلفه واتجه
من ديارك شرق واحذر تلف ولا تدور

دام نجد الشاعره جات واعطتنا وجه
وهو عطانا وجه من بعد خلونا شهور

اركب الاثنين باسلوبك الحلو وعجه
غرب وجهه واهمز مكيفه عن هالحرور

والطريق اللي معه جيت عود واسهجه
ومن نجاح مهمتك لا يجي راسك غرور

وكل واحد حطه بقسم والباب ازلجه
وعشهم هرفي ومعلوقه يقلقل فطور

وش طرا للهجس؟ما ادري لهالقاف نسجه
معه طفقات المشاعر بنت هذا الشعور

مع سلوك اعصاب الاحساس هالمتعروجه
ما استحبه سنَّد وما كره حوَّل حدور

اسمع لهوج الطواري بفكري بطنجه
قرقعة ددسن مفلل كفرها مع صخور

،
،،
،

البقا يا الشاعر اللي عرفنا منهجه
يستثير الصمت و يهيّج امواج البحور

يا عسى مافيه طلعه و لفه و ارتجه
في طريق السجن ، خابر طريق السجن بور

تعرف ان العود مشيّه يجي فيه عْرجه
ما يبا في سكته لا غراز ولا جسور

و النظر ما هو صريٌ يجي فيه و هجه
كل ما عاكس مع الدرب من يكبس بنور

وكل اذى عن عابر الدرب لو تسمح مجه
تكسب الحسنات ويزود في السجن الحضور

في بنات الفكر عندك تبختر و اغنجه
ما دريت اني على طرد شردهن جسور ؟

و اتنقى في الشوارد بنفس مبهجه
وما استمع في ناقد الحرف والدنيا عبور

و اختلاف الرأي ما افسد قضايا مدرجه
في كشوفات القضايا ولو شِهدوا بزور

،
،،
،

شاعرة نجد ,الجووهره ,خيال مطير معجبون بهذا