شبكة رواسي نجد الأدبية - عرض مشاركة واحدة

29-09-2022, 02:41 PM

اقتباس:

المشاركة الأصلية كتبت بواسطة خيال مطير

بمناسبة غياب الجوهره

البارحه جاني من الشوق مرسال
الشاهد الله يوم شفته تهنّيت
من جوهرتنا ذربة الحرف والقال
أصدق مشاعرها لمسته وحسّيت
أبيات صاغتها جواهر على آل
عجزت أنقّي من غلاها ولا بيت
عريبة المنسب من العم للخال
من طيّب النّبته تبين المنابيت
أغليتها لاشكّ والقلب ميّال
طبعي إذا حبّيت من قلبي أغليت
جت فوق هقواتي على كل معدال
الله هداني يوم فيها تهقويت
ليت المعاني تنتظم وسط سلسال
وانظم ثمين القاف والشعر ياليت
والله لالبسها بلا شك واختال
وافخر بها بين الملا لاتباهيت
يالجوهرة لاتشغلك بعض الأحوال
لايشغلك حالي إذا غبت وأبطيت
وسط الحنايا لك من الجال للجال
سيرة غلا ماتنتهي رحت أو جيت
ولك في عيوني ياغلا الروح منزال
وداخل رياض القلب شيّدت لك بيت
بعض الغلا يثبت كما تثبت جبال
حتى ولو أبطيت عنه وتنحّيت
ولايشغلك ياغالية هرج جهّال
لاتزعجك بعض العلوم الفتافيت
بعض الرجال المعذره ماهم رجال
ماتعرفين الحي منهم من الميت
البعض مايسوى ولايوصل ريال
ويخيس لو حطّوه وسط الحوانيت
كذّاب في غالب هروجه ومحتال
ومايحمل إلا الشر مثل الطواغيت
لو بحسب الشينه ترى ليلنا طال
أزرى المربّي ( مثل ماقيل ) وأزريت
والبعض لا والله صناديد وأشبال
يطير لانادوه مثل العفاريت
خفيف نفس وللمواجيب حمّال
ولايترك المسجد بكل المواقيت
ثابت على مبداه لو مات مامالل
اشفت مثله داخل القلب سمّيت
لكنّهم قلّه مثل حبة الخال
في وسط قفرا كلها هيت في هيت
ياللي تحسب المرجله هرج وجدال
زليت في ظنّك بلا شكّ وأخطيت
المرجله ماهي ترى كثرة أموال
الفقر ماعيّب قروم وشفاليت
والمرجله ماهي ترى بشت وعقال
ونتفة شنب لاحكّه الموس صديت
والمرجله ماهي خلق ثوب وسمال
وشماغ من كثر النشا به تنشيت
وتطرد بنزواتك ورا كل خلخال
ياكم لقيت من المهانه وهجّيت
والمرجله ماهي ترى هرج جوّال
وتعيش لحظاتك خداع وتناهيت
لاهمّتك زوجه ولاهمّك عيال
راحت حياتك بالسخافات تشتيت
المرجله صدق المواقف والأفعال
وسلوم مايقدر عليها الهلافيت
وختامها يالجوهره سترك الفال
يحفظك ربي كل مااصبحت وامسيت
وحبّك ترى مايثبته قطع ووصال
مادام لك في خافقي يالغلا بيت

تسلم خيآل الله يسعدك
قصيده جزله وأبيآت رآئعه
صح لسآن شآعرها
ويعطيك العافيه على نقلهاا

رحيل ,ناصر الهواوي ,عبدالله الصقري معجبون بهذا